Amlarem, Lber 26:
Ka UDP-Nongtalang Circle ka la pynkup burom ïa u Bah Lahkmen Rymbui uba la jop biang kum u MLA ka Amlarem konstitwensi ha ka jingïalang kaba i-phuh i-phieng.
Ïa ka jingïalang pynkup burom la pynlong ha ka janmiet Sngi Thohdieng ha Madan Remusan ha ka shnong Nongtalang kaba dei ka shnong trai jong u MLA.
Ïa ka jingïalang la pynïaid da u Bah Special Bareh bad la ïoh ïa ka jingkren pdiang burom na u Waheh Shnong ka Nongtalang, u Bah Min Lyngdoh.
Nalor ka jingpynkup burom ïa u MLA, ka UDP-Nongtalang Circle ka ai ruh ïa ki jingai sngewbha sha ki briew kiba duna dkhot met kumjuh sha ki ’riew tymmen kiba la noh ka rta bad sha ki nongrwai sur ilekshon.
La ïoh ka jingkren lyngkot na u Bah Hat Pohchen, Adviser Nongtalang Circle bad na u Bah Hatmin Lyngdoh.
U MLA ka thaiñ, u Bah Lahkmen Rymbui ha ka jingkren u la ong ka jingjop ilekshon jong u ka dei ka jingjop jong u paidbah la ka dei ïa ki nongkyrshan ne ki bym kyrshan kam pher, hynrei dei ban don ka mynsiem ban ïeid iwei-ïa-iwei.
Kumta u la khot ïa ki seng saiñ pyrthei kiba juh kynthoh bad kynnoh ban klet noh ïa ka ilekshon na bynta ka bha ka miat jong ka konstitwensi. U kyrmen ba kum u nongmihkhmat un dang buddien ïa ki skhim pynroi bapher-bapher ha man la ki shnong ki thaw jong ka konstitwensi.
Hadien ka jingïalang pynkup burom la ot ruh ïa u ‘cake’ ba la pynkhreh da ka UDP Nongtalang Circle.
