Aizawl, Lber:
Ki bor sorkar jong ka jylla Mizoram ha ka 24 tarik mynta u bnai ki la pyntip ïa ki metïap jong 3 ngut ki nongshong shnong jong ka jylla Mizoram, kynthup ïa kawei ka longkmie la lap na kawei ka khlaw kaba don hapoh u pud u sam jong ka ri Myanmar.
Kat kum ki jingïoh lum khubor la ïathuh ba kitei ki 3 ngut ki nongshong shnong ka jylla ki la jah rngai ha ka 19 tarik mynta u bnai hadien ba ki la mih na ka shnong Ainak, Siaha District ban leit sha Myanmar.
Kat kum ka jingïathuh jong ki bor pulit ka jylla, ki la pyntip ba kitei ki 3 ngut ki la shah bat ha ki katto katne ki briew kiba don bynta mynshwa ba ki seng kieng atiar. Na ka liang ki bor pulit ki la suba jur ba kitei ki 3 ngut ki la shah pynïap na ka daw jong ka jingbym lah ka jong ki ban siew ïa ka pisa na ka bynta ban thied ïa ki tiar siat.
Kat kum ka jingïathuh jong ki bor pulit ka jylla, ki la pyntip ba ïa ki metïap ba la ingkhong jong kitei ki 3 ngut la lap na kawei ka khlaw kaba don ha Myanmar – kaba jngai tang kumba 2 km na ka thaiñ khappud kaba don markhap bad ka jylla Mizoram. La lap ïa ki metïap jong kitei ki 3 ngut ha ka sngi Palei kaba la dep.
Na ka liang ki bor pulit ka jylla ki la suba jur ba ki runar kiba donkti ha katei ka kam bymman ki dei ki nongshong shnong ka ri Myanmar bad na ka liang ka jong ki ki la sdang ban pynlong ïa ki jingtohkit kiba bniah khnang ban ïoh kem noh ïa ki runar.
