Mexico City, Lber:
Katkum ka khubor ba la ioh lum ka iathuh ba ka ri Mexico ka lah dep ban phah ia ka jingtyrwa bad ka jing-iathong ha ka rukom kaba dei sha ka shlem treikam ba ha khliehduh jong ka International Olympic Committee (IOC) na ka bynta ban ioh ia ka hok ban pynlong ia ka Olympic ha u snem 2036.
Kumta na ka liang jong u myntri korbar-ri katei ka ri u Marcelo Ebrard bad ka nongpyniaid bahakhliehduh jong ka Mexican Olympic Committee(MOC) ka Maria Jose Alcala ki lah leit ban iakynduh ia u nongpyniaid bahakhliehduh ka IOC u Thomas Bach ha Lausanne, Switzerland na ka bynta ka tei ka kam. Shuh shuh ruh katei ka jingleit buh jingtyrwa jong katei ka ri hakhmat ka IOC ka iadei-dur ruh bad ka jingpynkhreh jong ka ri Mexico na ka bynta ban rakhe ia ka lyng-khuh 100 snem jong ka Mexican Olympic Committee (MOC) bad ka ban iai long shuh shuh ka ban shongshit bad shitrhem lada ka tei ka ri ka iohpdiang ia ka hok na ka bynta ban pynlong ia ka lympung; naba u long ruh u snem ha kaba katei ka ri kan rakhe ia katei ka lyngkhuh jong ka MOC.
Ki nongmihkhmat jong katei ka ri ki iathuh ba kiba bun na ki jngteh ki long kiba donkam na ka bynta ban thaw thymmai ia ki khnang ban ioh pynlong ia katei ka lympung ialehkai kaba don ia bun tylli ki jait jing-ialehkai bapher bapher ia kaba lah dep ban jied ia ki na ka bynta ban pynlong ha ka lympung bad ruh ban thaw ia kawei ka Komiti khnang ban long ka nongai mynsiem bad ka nongkyrshan ia katei ka jingtyrwa ka ri ha ka jing-iathong jong ka mynta.
Kum ban shu pynkynmaw biang hangne ka long ba ka ri Mexico ka lah dep ba pynlong teng ia katei ka lympung ialehkai ha u snem 1968 ha nongbah Mexico City. Nangta ka la ioh ruh ban pynlong ia ka World Cup phutbol ha u snem 1970 bad 1986, bad mynta ka kynti kan long kawei ka ri ha ka jingiasnohktilang ban pynlong pat ia ka lympung ialehkai World Cup ha u snem 2026 ryngkatlang bad ka Canada bad USA.
