Shillong, Lber 26:
Ki khubor hamsaïa ha Sohïong konstitwensi ki la pur sted ha kine ki sngi ba ka UDP ka la leit pynïasoh sha ka NPP hadien ba ka la leit ban ïatreilang ban thaw ïa ka sorkar synrop kaba thymmai ha ka jingïadonlang ka BJP.
Kane ka khubor hamsaïa ka la poi shaduh tyndong shkor u President ka UDP sengkmie, u Bah Metbah Lyngdoh kat haduh ba u hap ban pynshai sha ki nongkyrshan ka UDP Sohïong circle ba kane ka khubor kam dei kaba shisha kumba la pynsngewthuh bakla da ki katto-katne ki briew.
Kane ka jingpynshai u Bah Metbah ka dei ha ka por ba ka seng ka la leit ban pynbna ïa ka kyrteng u Bah Synshar Lyngdoh uba dei pyrsa trai jong u Bah HDR Lyngdoh (bam kwai ha dwar u blei) ba un long kum u kyrtong ka UDP ban ïakhun ïa kane ka ilekshon MLA kaba dang sahteng ha Sohïong konstitwensi kaba ki la pynlong ïa ka jingïalang ha phyllaw ïing u Bah HDR Lyngdoh ha Sohïong ha ka 25 tarik Lber, 2023.
Haba ai jingkren ha kane ka jingïalang, Bah Metbah u la ong, “Nga sngewsih haba nga ïohsngew ïa ka khubor haba ïaid sharum shaneng kaba pynsah umdum ïa ki paidbah da kaba kynnoh ba ka UDP ka la rung sha ka seng NPP”.
Kumta u la pynshai ba ka UDP kam dei ba ka leit rung sha ka seng NPP, hynrei ka leit ban thaw ïa ka sorkar synrop kaba la ïalam da ka NPP.
“Ki paidbah ka Sohïong konstitwensi ki dei ban shai namar ngi wan ban pynbna ïa ka kyrteng jong u Bah Synshar, ngi wan na ka seng UDP ym da kawei ka seng” u la ong.
Kane ka jingpynshai u Bah Metbah ka dei namar ki la don ki nongkyrshan ka UDP na Sohïong kiba la phone beit sha u kiba la kylli hato ka UDP ka la rung sha ka seng NPP?.
Kumta u Bah Metbah u la pynshai ba haduh mynta ym pat ju don ka seng saiñpyrthei ha Meghalaya ban jop marwei haduh 31 ngut ki MLA ha man ki ilekshon, hynrei ki jop khyndiat ngut kaba la hap ban pynlong ban synrop haba thaw ïa ka sorkar.
Nalorkata, u la ïathuh hadien ba la dep ñiew vote ka NPP ka jop 26 ngut ki MLA, ka UDP ka ïoh 11 ngut, ka BJP bad HSPDP ki ïoh mar 2 ngut, ka Congress bad TMC ki ïoh mar 5 ngut, ka VPP ka ïoh 4 ngut bad ki MLA shimet ki don 2 ngut.
Shuh shuh u la pynshai ruh ba wat ka BJP kaba dei ka seng kaba la synshar ïa ka ri India ka la synroplang ha kane ka sorkar, kam mut ba ka la rung sha ka seng NPP.
U Bah Metbah u la pynkynmaw ba ha ka ilekshon MLA ha u snem 2018, ka UDP ka jop tang 6 ngut ki MLA. Hynrei, ha ka ilekshon MLA 2023 ka la ïoh haduh 11 ngut bad ka seng ka donkam ban jop sa ha Sohïong konstiwensi.
Ha kane ka sngi ba pynbna ïa ka kyrteng u Bah Synshar Lyngdoh uba baroh ki tip kum u Pup la ïadonlang ki bahaïing hasem jong u Bah HDR Lyngdoh, ki MLA ka UDP, ki MDC bad ki nongkyrshan kiba la wan ban sakhi ha kane ka jingïalang.
