Australia, Lber:
Na ka liang jong ka Federation Internationale de Football Association (FIFA) ka pynbna paidbah mynta ba ka lah buh ruh ia ka por ka ia na ka bynta ba kan jied ia ka ri ka ban ioh ia ka hok ban pynlong ia ka lympung ialehkai World Cup jong ki kynthei ha u snem 2027. Kane ka wan ruh ha ryngkat ka jingai por ia ki kyrtong-ri da shi bnai pura na ka bynta ba kin pyniasoh ha ka jing-iaknieh pynlong ia ka lympung ha shuwa ban jied lyngba ka jingiathep vote ka ban sa pynlong ha u bnai Jymmang jong u snem ban wan.
Ka khubor ka iathuh ruh ba ka ri Brazil, South Africa bad ka ri Belgium, Germany bad Netherlands kiba long ki co-hosting project ki lah dep ban pynpaw teng mynshuwa ba ki kwah ban iathong na ka bynta ka jingiaknieh pynlong ia katei ka lympung ialehkai kynjatbol ki kynthei.
Na ka liang jong ka FIFA ka iathuh ba ka kynhun pyniaid jong ka Council baroh kawei kaba don ia ki 37 ngut ki dkhot na kylleng ka pyrthei kum kawei ka kynhun kaba hap hapoh ka jingpyniaid jong u nongialam bahakhliehduh ka FIFA u Gianni Infantino, kan sa shong na ka bynta ban jied haduh lai tylli ki jingiathong kiba kham hadien ha ka jingiaid lynti na ka bynta ka jing-iathep vote ka ban long palat ia ki 200 tylli ki dkhot- shnat synjuk kiba pyniasohlang bad ka synjuk baroh kawei. Kumta ia ka rai ba khatduh yn sa shim ha ka FIFA Congress ka ban sa long pat ha ka 17 tarik u Jymmang 2024 ha ryngkat bad ka jaka ia kaba ym pat shym la lah ban pynbna mynta.
Ka FIFA ka lah buh ruh ia ki tarik ba hakhmat ka ban ialam sha ka jingiathep vote, da kaba sdang ha ka 21 tarik u Iaiong kum ka tarik ba khatduh na ka bynta ki dkhot jong ki synjuk-shnat bapher bapher ba kin pynrung kyrteng ialade ha ka jingkwah jong ki na ka bynta ka jing-iathong.
Shuh shuh ruh ka FIFA ka iathuh ba ki dei ruh ban shimbynta ha ka lympung ialehkai jong u snem 2023 ha u bnai Naitung bad Nailar ha kaba la long nongpyniaid lang (co-hosted) ia ka lympung da ka Australia bad New Zealand bad ruh ban phah ia ka jingtyrwa ha ka rukom kaba dei ryngkat bad ka FIFA la kumno kumno ha ka 8 tarik u Nohprah mynta u snem.
Ka FIFA Council kan sa jied bad thung ruh ia ka Evaluation Panel na ka bynta ban jngoh bad ban pyntreikam ia ki jingtyrwa baroh ki ban wan shuwa ban pyllait ia ka kaiphod sha kita ki ri ha shuwa ka sngi iathep vote.
Ha kaba iadei bad katei ka lympung ialehkai jong ki kynthei ka ban sa long ha utei u snem, ka khubor ka iathuh ba ka FIFA ka lah ibit na ka bynta ban don ia ki 32 tylli ki kynhun ialehkai ki ban ialehkai ha ki 64 tylli ki jingialehkai.
