Khliehriat, Lber 26:
U Sanju Haque Lasker, (29 snem) na Sonai, Kachudharam, Dakshin Mohanpur Part-VI, Cachar Silchar u la shah kem halor ka jingkhaïi ïa u suba ‘Heroin’ ba khia 125.19 gram.
U Lasker u la shah kem ha ka Sngi Saitjaiñ na East Jaiñtia Hills District.
Ki pulit ki ïathuh ba ki pulit ka Lumshnong PS ha ka jingkhynra kali ki la phah sangeh ïa kawei ka kali ‘tourist’ rong lieh kaba don ïa u nombor ML-05-J-8725 bad ha ka jingkhynra la lap 10 tylli ki synduk sabon na kawei ka pla jong u Lasker.
Hadien ba la pyndep ïa baroh ki jingdonkam katkum ka NDPS Act bad ha ka jingdonlang ki nongsakhi la peit bniah ïa utei u kynja ‘powder’ bad la pyntikna ba u dei u ‘Heroin’ uba khia 125.19 gram.
Halor kane la pynngat mukotduma ha Lumshnong PS katkum ka Case No. 17(3)2023 u/s 21(b)/29 NDPS Act.
Na utei u briew, ki pulit ki la kurup ruh ïa ka pisa T.4,550 bad ki ‘Identity Card’ ba kynthup ïa ka EPIC, AADHAR bad Driving License.
