Bhopal, Lber:
Ka sorkar Madhya Pradesh ka la rai ban plie biang ha ka ban pynrung kyrteng na ka bynta ka jingthied ïa u kew na ka bynta lai sngi naduh ka 22 tarik, Lber hadien ba ka la don ka jingwan hap jong u slap uba kynsan ha kaba u la pynjulor bun ïa ki jingthung jingtep ha ka jylla. Ka jingsangeh na ka bynta ban pynrung kyrteng ka la long ha ka 28 tarik, Rymphang, ha kaba la pynjlan sha ka 5 tarik, Lber.
Ka sorkar jylla ka la pynbna ruh ban ai jingïarap pisa kaba T. 32,000 shi Hectare bad ka jingsiew kaba hashwa halor ka jingjulor jong ki jingthung da 50 per cent. Kane ka jingplie biang ïa kane ka jingpynrung kyrteng kan sa ïarap ïa ki nongrep, kiba la duh noh ha ka bynta kaba nyngkong ba kin ïohlad biang ban die ïa u kew lyngba ki kynhun ba la buh da ka sorkar ha ka Minimum Support Price (MSP) kaba T. 2,125 1 kwintal (Quintal).
Kane ka jingthmu pyntreikam ka long shi bynta ban kyrshan ïa ka ïew ha kaba ïa ki dor jong ki mar rep la buh duna ban ïa ka dor ha ka MSP ha kaba ka la buh jingeh ïa ki nongrep. U kew ha Neemuch, Mandsaur, Ratlam, Khargone, Datia, Satna, bad Vidisha distrik u la shah ktah jur na ka jingwan hap jong u slap uba jur.
U Myntri Rangbah jong ka jylla u Shivraj Singh Chouhan u la leit jngoh ïa ki shnong kiba la shah ktah jur ha Vidisha bad hukum ïa ki heh ba dei khmih ba kin lum jingtip halor ka jingdon jong ki jingthung jingtep kiba la shah pynjulor na ka jingwan hap jong u slap khnang ban lah ban ai bailutksan sha ki nongrep, la ïathuh ka tyllong khubor.
“Wat lada ka jinghap jong u slap ka ai jingmyntoi ïa ki jingthung jingtep, hynrei ka jingwan ryngkat jong u slap ha ryngkat ka jinghap u phria ka la pynjulor ïa ki jingthung ha kiba bun ki shnong jong ki katto katne ki distrik. Nga la dep ban hukum ïa ki heh ba dei khmih ba ki dei ban shimkhia ha kaba ïadei bad ka jingpynlong ïa ka jingkhmih bad wad bniah ha kaba ïadei bad ka jingshah pynjulor jong ki jingthung jingtep ha ka jinghap phria khnang ban tip bniah ïa ka jingduhnong jong ki nongrep,” la ong u Chouhan.
Ki nongrep kiba la shah ktah jur ki la dei ban ïoh ïa ka bailutksan, kynthup ha kaba ïadei bad ki jingïarap kiba hap hapoh ka Crop Insurance Scheme, la pynbna u Myntri Rangbah kumba ju leh ha ki por ba la leit. U la ong ba ka sorkar borabor ka la ïeng na ka bynta ki nongrep bad “kan sa leh na ka bynta ki jingdonkam baroh ha kaba ïadei bad ka jingïakynduh jingeh jong ki ha kaba ïadei bad kane ka jinglong jingman”.
