London, Lber:
Katkum ka khubor ba lah pynbna da ka klob Tottenham ka long ba u nongialam jong katei ka klob u Antonio Conte u lah mihnoh na ka kynhun ialehkai baroh kawei hadien ba ka jingiakren bad iamir jingmut baroh hapdeng jong u bad ki nongpyniaid bahalor jong ka klob ka lah poi sha ka jingiasngewthuh jingmut bad iamynjurlang na ka bynta ban pyllait noh ia u na ka kynhun ialehkai baroh kawei. Kane ka wan ruh hadien ba u Conte u lah dep ban pyntyllun ia ka kam shakri ha kane ka klob kumba 16 bnai.
Kumta ruh katei ka jingmihnoh jong u na ka klob ka urlong mynta hadien ba ka kam shakri jong u ka lah poi hapdeng ka jing-artatien kaba khraw na ka bynta ba un dang iaineh ha ka klob hadien ba ka kynhun ka lah shah pyniakhaid kol noh da 3-3 ha ka klob Southampton ha ka jingiakhun jong ki ha ka 18 tarik mynta u bnai. Kane ka long ruh ka jingialehkai ka bym shym la poi pyrkhat ba kan shah pyniakhaid naba ka Tottenham ka la lah tam kol lypa shakhmat da haduh 3-1 ha ki por ialehkai ba shakhmat.
Hangne ka khubor ka pynkynmaw ruh ba u Conte u lah shimti kum u nongialam katei ka kynhun ha u bnai Naiwieng 2021 bad mynta ha ka jaka jong u yn sa mih bujli noh da u symbud jong u; u Cristian Stellini tad haduh kaba kut syndon jong ka aiom ialehkai ba mynta.
U Conte u lah mihnoh na ka klob mynta da kaba ieh ia katei ka kynhun ialehkai ha ka kyrdan ba 4 ha ka miej khein dor-thong jong ka EPL, hynrei tang ar dor-thong halor jong ka klob kaba lah wan ha ka kyrdan ba 5 ka Newcastle kaba don ia ki ar jing-ialehkai ha ka kti jong ka ha ka jingiakhun jong ka na ka bynta ban shah jied sha ka Champions League.
Kham mynshuwa, u Stellini u lah ioh teng ha ka ban pyniaid ia ka kynhun ialehkai ha ki lympung iakhun ha ka por ba u Conte u dang don hapdeng ka jingshah sumar bad ban ioh ruh ia ka jingkoit na ka jingshah sumar ka met jong u.
Kumjuh ruh ha ki por ba u Conte u dang long u nongialam jong kiwei pat ki klob ha ki snem ba mynshuwa, u la lah ba khur ia ki 2 tylli ki trophy na ka lympung ialehkai ha ki lai samoi jingshakri jong u kum u nongpyniaiad jong ki klob bapher bapher kata ha Juventus, Chelsea bad Inter Milan, hynrei u bym shym la lah pat ban pynkut noh ia kata ka jing-ap kaba kaba 15 snem kynthih jong ka klob Tottenham na ka jingshah rem ka jong ka bad ban rah ia ka thong jingjop na ka lympung.
