Nongstoiñ, Lber 27:
Ka Federation of Khasi Jaiñtia & Garo People (FKJGP), West Khasi Hills, ka la pynpaw ïa ka jingsngewdiaw kaba jur halor ka jingjubab u Myntri ka tnat ïalehkai u Bah Shakliar Warjri halor ka jingkylli kaba la wanrah da u Bah Gabriel Wahlang, MLA ka Nongstoiñ constituency ha kaba ïadei ban pynïoh ïa ka madan phlang plastik (artificial turf) ha West Khasi Hills kaba dei ka jingangnud jong ki samla kane ka thaiñ.
Haba pynpaw ha ki lad pathai khubor ha ka Lah Sngi U Blei, ki nongkitkam ka FKJGP ki la pynpaw ba ka jubab jong u Myntri ka tnat ïalehkai ban ong ba ka jngai bah ïa ka West Khasi ban ïakren ïa ka Artificial Turf, ka FKJGP ka ong ba katei ka jingjubab jong utei u Myntri ka long ka bym sngewïahap satia bad na ka liang ka seng kam lah ban pdiang.
Kumta ka seng ka la kyntu ruh ïa utei u Myntri ka tnat ïalehkai ba u dei ban da ïakynduh shwa ïa ki ophisar ba dei khmih bad ruh ban wan jngoh shwa ïa ka West Khasi Hills District khnang ban tip, ym ban shu kren mutdur.
Nalorkata, ki la ong ruh ba u Myntri ha ka jingshisha lada u ong kumtei u dei ban pynshai kaei ka daw ba ym lah ban ai madan plang plastik ïa ka West Khasi ym ban shu kren kutlad. Kane ka pyni ruh ba um burom ïa ka jingangnud ki samla jong ka West Khasi Hills. Ha ka jingshisha shwa ban kren kumtei u la dei ban da wad bniah lane peit bniah bha shwa bad um dei ban shu pynduh jingkyrmen.
“Ha ka jingshisha ka West Khasi Hills ka don ar tylli ki madan ïalehkai phutbol, kawei ka madan Nongpyndeng jong ka NDSA bad kawei ka Nongpathar Stadium ha Pyndengrei. Kitei baroh ar tylli ki madan ki long kiba lah bit lah biang pura ban ïoh ïa u artificial turf, hynrei balei u ong ba ka jngai bah ban ïoh artificial turf. Ka madan jong ka NDSA ha Nongpyndeng kumba la kular u Bah Banteidor Lyngdoh Myntri barim ka tnat ïalehkai kam long mo ban shna noh ïa ka madan Nongpathar Stadium ha Pyndengrei. Kane lei ka dei ka madan kaba don ha ka kti jong ka Sorkar, kata ha ka Directorate of Sports & Youth Affairs kaba lah dei ka jaka kaba lah bit lah biang bha, hynrei ban shu jubab ba ka jngai ngim sngew lah pdiang da lei-lei” la ong ki nongkitkam ka FKJGP.
Ki la ong ruh ba ka West Khasi Hills ka dei kawei na ki district kaba la rim tam hapoh ka Jylla. Ka dei kaba don ïa ki paidbah kiba dei ki riew ïeit phutbol bad ka dei ruh kawei ka district kaba la sei bun ïa ki ’rang bad ki ’thei ïalehkai ba tbit ban mihkhmat ïa ka Jylla ha ki kam ïalehkai bapher bapher. Hato, balei kiwei ki district ki ïapher bad ka West Khasi Hills?
“Ka long kaba sngewsih ba kane ka Sorkar ha ki snem ba la lah ka la pynïoh madan phlang plastik ïa kiwei ki district, hynrei balei ka jngai ha West Khasi Hills ” ki la bynrap.
Namarkata, ka FKJGP ka la dawa ïa u Myntri ka tnat ïalehkai bad ka Sorkar Jylla ba ki dei ban phai khmat kyrpang ïa ka West Khasi ban pynïoh noh ki lad ban pynbha ïa ki madan ïalehkai kiba don ha West Khasi, kata khlem da ong artificial turf ne natural grass, hynrei ban pynbha noh ïa ki madan ïalehkai ba kin ïa hap dur katkum kane ka juk mynta.
