Shillong, Lber 27:
U Myntri ka tnat Pule Puthi ka jylla, u Rakkam A Sangma, ha ka Lah Sngi U Blei u la pyntip hapoh ka ïingdorbar ba ka Sorkar kan sa thaw noh ïa ka State Education Commission (SEC) hapoh ka shi bnai.
“Ka Search Committee ka la nang pynïaid ïa ka kam, bad kumta kan long kaba eh ban buh ïa ka por, hynrei kaba slem eh kan long hapoh shibnai (ban sa thaw),” la ong u Rakkam haba jubab ïa ka jingkylli bynrap ba la wanrah da u MLA ka VPP na Nongkrem u Bah Ardent M Basaïawmoit hapoh ka dorbar mang tyngka kaba dang ïaid mynta.
U Myntri u la pyntip ba ka Education Commission kan don ïa ka kynhun ki nongtrei ba kynthup ïa ki stad ki jhad ha ka liang ka pule dangle, kynthup ruh ki akhia (Academician) bad ki riewshemphang (Expert) na ka Management bad ka Educational Planning.
U la ong ba ka jingthmu ba kongsan eh jong ka Education Commission ka long ban ai jingmut ïa ka Sorkar Meghalaya halor ki kam ba ïadei bad ka rukom siew tulop jong ki skul, ki rukom pynïaid ïa ki skul, ka jingdon ki bor pynïaid skul bad kumjuh ruh ïa ka jingtreikam haba shit haba shai.
Haba kdew ruh ïa ka bynta bad ka kamram jong ka Commission, u Rakkam u la ong, ka Commission kan khmih ruh ïa ki kam kiba ktah ïa ka kam pule dangle ha Meghalaya haba ïadei bad ka jingpynïaid ïa ki skul ba ïarap ka sorkar, ka jinglah shakri jong ki, ka jingtreikam bad jingshai jong ki SMC bad kiwei kiwei.
Ka Commission kan khmih ruh ïa ka jingwanrah ïa ki kyndon treikam ki ban pyntikna ïa ka jingsiew ba mar kat juh haba ïadei bad ka tulop jong ki nonghikai ha ki kyrdan ai jingïarap bapher bapher, kaba ïadei bad ki nonghikai ka Sorkar.
Kan ai jingmut ia ka Sorkar ïa ka sienjam ba shakhmat halor ka kam ba ïadei bad ki nonghikai Samagra Shiksha Abhiyan, ka jingpynkhlaiñ ïa ka jingai jingshakri jong ki skul khamtam ki skul ki bym lah treikam, ki skul ba mih tam, ki skul ba duna khynnah, ki skul ba tang iwei i nonghikai bad ki jingeh ba ïadei bad ka jingbym ïoh ïa ki nonghikai ba hikai ha ki ktien bapher bapher khamtam ha ki jaka khappud, bad kiwei kiwei.
