Shimla, Lber:
Ka seng Congress ha Shimla ba la lamkhmat da u Myntri Rangbah jong ka Himachal Pradesh u Sukhvinder Singh Sukhu ka la pynlong ïa ka jingïakhih ba la tip kum ka `Sankalp Satyagraha` ban pyrshah halor ka jingshah mait kyrteng noh jong u heh nongïalam barim jong ka seng u Rahul Gandhi na Lok Sabha.
Ki nongïalam jong ka seng Congress ha ryngkat kiba bun kiwei pat ki Myntri jong ka Cabinet ki la ïashim bynta ha ka jingïakhih da kaba thang ïa ki mombati.
U Myntri Rangbah, ha ka por ba u la kynthoh pyrshah ïa ka sorkar kmie u la ong ba ka lah ban khanglad ïa u Rahul Gandhi ba un don hapoh ka Parliament, hynrei ym hapdeng ki paidbah.
“Ki paidbah bad ki riewsaiñ pyrthei kim pat ju mad kum ïa kine ki jinglong jingman kiba mih mynta ha ka ri namar ka jingdon jong ki rukom pyntreikam kiba sniew bad kiba long pyrshah ïa ki paidbah ïa kaba la leh da ka sorkar kmie. U Rahul Gandhi u la long ka sur jong ka synshar paidbah bad ka seng ka la long ka seng kaba heh tam hapdeng ki seng saiñ pyrthei. Um shym leh ïa ki kam saiñ pyrthei na ka bynta ban ïohlong MP ne na ka bynta ka shuki Myntri Rangbahduh. Ka synshar paidbah ka don ha ka jingma kaba khraw bad ngin sa hap ban ïalei ban ïada ïa ka,” la ong u Myntri Rangbah.
Katba u Myntri ka Cabinet u Vikramaditya Singh ha ka por ba don ka jingïakhih u la ong ba ka synshar paidbah ka la shah mait bad shah pynïap ha kaba ka la nang pynsniew ïa ki jinglong jingman.
“Ka Parliament ka la long ka Temple jong ka synshar paidbah hynrei ka liang pyrshah kam shym la ailad na ka bynta ban khmih bniah ïa ki mat bad ba kam ju ailad ïa ki ban pynmih ïa ki sur jingdawa. Na ka bynta kito kiba thmu ban pynmih ïa ka sur jong ki paidbah, ka ju don ka jingshah mudui kaba long pyrshah ïa ki. Ngin sa ïakhun ha kaba ïadei bad kane ka thma, lada kum kine kiei kiei ki dang ïai bteng ha kane ka ri ka lawei ka ri kan sa sah ha ka jingdum,” la ong u Singh.
U Rahul Gandhi, ha ka sngi Thohdieng u la shah weng noh ïa ka jinglong dkhot kum u dkhot jong ka Lok Sabha, shi sngi hadien ba ka ïingbishar ha Surat ka la rai pynrem ïa u da kaba set patok ar snem halor ka jingjia jong ka jingpynjah burom kaba long pyrshah ïa u halor ka jingkynthoh pyrshah ïa ka jait Modi.
Kane ka rai jong ka ïingbishar ka la long hadien ka jingmudui halor ka jingkren jong u kaba u la kren ha u Ïaïong jong u snem 2019, ha kaba u la ong, “ha kano ka rukom baroh ki nongtuh ki don ïa kajuh ka jait kata ka jait Modi” ha ka por ba don ka jingïalang paidbah na ka bynta ka ilekshon sha Lok Sabha kaba la long nha Kolar kaba don ha Karnataka.
