Dehradun, Lber:
Ki la don kumba 350 tylli ki blang kiba la ïap hadien ka jingshah pom pyrthat ha Dunda Block jong ka Uttarkashi ha ka jingjia kaba la jia ha ka miet jong ka sngi Saitjaiñ, ha kaba kiba bun ki nongrep kiba don ha ki jaka lum jong ka Uttarakhand bad ki nongsharai jingri ki la ïakynduh jingeh na ka jingthut ka suiñ bneng. Ki la don kumba 350 tylli ki blang kiba la shah pom pyrthat ha kaba ki la ïap ha ki bynta jong ka khlaw kaba don ha Mathanau Tok hajan ka shnong Khattukhal kaba don ha Dunda Development Block jong ka Uttarkashi.
Ki nongsharai blang ki la ïalam ïa ka kynhun jong ki blang jong ki sha ka thaiñ Barsu kaba don ha ki jaka lum na ka bynta ban leit pynbam phlang. Ha ka sngi Balang ki nongshong shnong kiba kynthup ïa u Ram Bhagat Singh, Pratham Singh bad u Sanjeev Rawat ki la don ha ka lynti ban leit sha khlaw ha ryngkat ki 1200 tylli ki blang ha ka por ba la jia katei ka jingjia kaba sngewsih. U Tehsildar u Dunda Pratap Singh Chauhan u la ong ba haba u la ïoh jingtip shaphang ka jingïap jong ki blang namar ka jingshah pom pyrthat u la pyntip sha ki bor pynïaid distrik bad sha ka tnat Veterinary shaphang kane ka jingjia.
Ka nongpynïaid jong ka shnong Dunda ka Sunita Negi ha ka jingïakren bad ki nongthoh khubor ka la ong, “U Sanjeev Rawat, u nongsharai blang jong ka shnong Bharsu ha Bhatwadi Block, u la duh bun eh ïa ki blang ha ka jingjia ha kaba ki la don baroh 188 tylli kiba la ïap’. “Wat lada ki nongsharai blang ki la pyntikna ba ki jingri jong ki, ki la ïap na ka jingshah pom pyrthat, ka sorkar ka la ai bailutksan ïa ki tang khyndiat eh, ka jingdawa jong ngi ka long ba ka sorkar ka la dei ban ai ïa ka bailutksan kaba ïabiang bad ka jingduhnong”, la bynrap ka Sunita Negi.
Hashwa kane, ka jingwan hap jong u slap ka la pynjulor shibun eh ïa ki soh ba la thung da ki nongrep. U nongai jingmut jong ka seng BJP ha ka distrik, u Jagmohan Singh Rawat, uba la dawa ba la dei ban pynïoh ka bailutksan kaba biang na u Myntri Rangbah u la ong, “Kiba kum kine ki jingjia ki la ïai jia ha ki nongsharai jingri, hynrei kim ju ïoh ïa ki bailtuksan kumba ki dei ban ïoh’. Ki nongshong shnong ki la pyntip sha ka heh jong ka Bhatwadi Block ka Vinita Rawat shaphang ki jingduhnong. Ha kajuh ka por, ka la don ruh ka jinghap jong u phria ha ryngkat u slap ha Dhanolti ha ka janmiet jong katei ka sngi, ha kaba ki soh bad ki jingthung jingtep ki la shah pynjulor lut.
