Shillong, Lber 27:
Ka la long ka sngi kaba shongshit bha ïa kito kiba ju sngewtynnat ha ka jingïamareh bad ïaid kjat sha ki lum ki wah. Ïa ka Khatarshong Adventure Trail Run kaba lai la sdang da u Bah Anthony Khongrymmai, Sordar Mawmihthied bad Bah M.W Kyndiah, GM GAIL na Mawmihthied ha ka 25 tarik Lber, 2023.
Ha kane ka jingïamareh ki don haduh 82 ngut ki nongïashim bynta kiba wan na kylleng ki jaka. Ka lynti mareh ka kynthup ïa ka jingnoh ïa ki thieb na Sohrarim sha Nongtraw bad ki thieb ba kiew malu-mala, ki lynti ba mih ki siej, ki wah bad ki thieb kiba tan bha. Kane ka lynti mareh ka long 16 km kaba hap ban ïaid lyngba 11 tylli ki shnong ha kaba ka por kaba slem tam ban mareh ka long 8 kynta.
Ki shnong ha kine ki thaiñ ki long kiba la sumar khuid bha da ki nongshong shnong. Namar ba kane kam dei ka jingïakob, kumta ki nongmareh ruh kim da kyrkieh than ban beh ïa ka por. Ha kane ka lynti la kynthup ruh ïa shibun ki jingïalehkai kiba ki nongïashim bynta ki la ïoh lad ban ïashym bynta. Don kiba jngi kai ruh ha ki wah duid, don kiba ïakren kai bad ki trai shnong bad don ruh kiba mad ïa ki soh ki pai kiba mih ha kito ki thaiñ.
Ka jingthmu jong kane ka lympung kam shym long tang ban ïamareh, hynrei ban leh eiei ki kam kiba bha na ka bynta ki khynnah ha kito ki thaiñ. Ki nongmareh ki la noh synñiang da kaba ai jingïarap ïa ki khynnah skul ha shnong Pdei.
Ïa kane ka jingmareh la pynkut noh ha Kongthong Traveller Nest. U Trai ka Kongthong Traveller Nest, Bah Rothell Khongsit, u la pdiang sngewbha ïa baroh ki nongïashim bynta da kaba ai jingbam bad jingdih pyngngad. La pynkut ïa kane ka lympung da ka jingkren na u Secretary ka shnong Kongthong, u Bah Stogent Lynrah bad ka jingsam ïa ki takma sha baroh ki nongïashim bynta.
