Shillong, Lber 27:
Ka Myntri ka tnat ka koit ka khiah ka Jylla, ka Dr. M. Ampareen Lyngdoh ka la ong ba ka pisa COVID kaba T.43 klur kaba la sngewthuh bakla ba ka la jah ka dei ka bym pat pynlut bad yn sa pyllait noh ïa ka.
Ka la ong ruh ba ka jingpyllait ïa ka pisa kan long katkum ka jingtyllun jong ki kam ba la mang.
Ka Dr. Lyngdoh ka la ong ïa katei haba jubab hapoh ïingdorbar ïa ka ‘Zero Hour’ ba la wanrah da u MLA ka VPP na North-Shillong, Bah Adelbert Nongrum halor ka jubab RTI jong u Bah Disparsing Rani ba la kynnoh pyndonkam bakla ïa T.43 klur ba la mang ban ïakhun na bynta ka khlam COVID-19 hapoh ka Jylla.
Ka Myntri ka la ong ruh ba ha ka por jong ka khlam, ka Sorkar Pdeng lyngba ka tnat ka koit ka khiah ka la wanrah ïa ka Emergency COVID Response Package (ECRP) ban kyrshan ïa ka Jylla ha ka ban ïakhun ïa ka COVID-19.
Ïa katei ka song jingïarap la phah sha ka Jylla ha ki 2 kylla – ECRP Phase I (2020-21) bad ECRP Phase II (2021-22) hapoh ka jingkyrshan pisa ka National Health Mission.
Ka ECRP Phase-I ka dei kaba la kyrshan pisa 100% da ka Sorkar Pdeng, katba ka ECRP-II ka don ïa ka jingkyrshan pisa kaba 90:10, na ka Sorkar Pdeng bad Sorkar Jylla.
Ka Myntri ka la pynshai ruh ba ka jingkylli ba la kylli ha ka Dorbar Synrai jong u snem 2022 ka dei halor ka jingpynlut na ka Sorkar Pdeng bad Sorkar Jylla bad kumta ka jubab kaba la ai ka long T.76.56 klur hapoh ïingdorbar.
Ka la ong ruh ba ka RTI ba la pan na ka tnat Sorkar Pdeng ka dei halor ka pisa kaba la mang ïa kaba la jubab ba la ai katkum ka 20 tarik u Kyllalyngkot, 2023 ka long T.104.12 klur.
“Nga kwah ban pynpaw ba ka pisa kaba la kdew ha ka RTI ka long kaba dei, hynrei ka jubab kaba la pynsngew ha katei ka Dorbar Synrai ka dei halor ka pisa kaba la dep ban pynlut lypa,” la ong ka Myntri.
Ka la bynrap ba ki kam bapher-bapher ba la mang hapoh ka ECRP-II ki dei ki kam kiba slem bad kine ki dang ïaid mynta.
Ka la ong ruh ba ka jingmang na bynta kawei ka bynta kaba heh jong ka song – Critical Care Block kaba kot sha ka T.21.38 klur la dep ai kham hadien ban ïa kiwei-kiwei.
Shuh shuh ka la ong, “Kumta ka pisa kaba la sngewthuh bakla ba ka la jah ka dei ka bym pat pynlut bad yn sa pyllait katkum ka jingtyllun jong ki kam ba la mang.”
