Mawkyrwat, Lber 27:
Ka Pynkynmawlot Association Nongnah ha ka Sngi Saitjaiñ ka la pynhap pyrda noh ïa ka lympung ïalehkai phutbol ba la tip kum ka 2nd Pynkynmawlot Football Tournament ha madan Mawkyndeng Nongnah, South West Khasi Hills.
Ha katei ka sngi pynkut ïa kane ka lympung, ka Dang Pyrshang FT ka la khur ïa ka nam lahduh hadien ba lah pynliem noh ïa ka Nongktieh SC da 1-0 kol.
Ha kane ka sngi la ïadon ryngkat u Bah Shiningstar Wanñiang, President HYNF SWKHD bad haba ai jingkren nyngkong eh u la pynpaw ïa ka jingai khublei ïa ka seng kaba la pynlong ïa kane ka lympung kum shi bynta ban kyntiew ïa ka sap ka phong jong ki khun samla kane ka dong ka thaiñ.
Nangta u Bah Shiningstar u la ai ruh ka jingkyntu kynpham ïa baroh ar tylli ki kynhun ba ki dei ban pyndonkam hok ïa la ki sap ki phong khnang ba ka jingïalehkai jong ki kan ym kut tang hangne, hynrei ba kin poi sha ki state level, national level bad kiwei kiwei.
