Nongpoh, Lber 27:
Ki pulit ka Ri Bhoi District ha ka janmiet jong ka 26 tarik mynta u bnai, ki la ïoh ban kem noh ïa lai ngut ki briew kiba la donkti ban shalan beaiñ ïa u drok na ka jylla Assam sha Shillong.
Katkum ka tyllong khubor na ki pulit, la ïathuh ba hadien ka jingïoh jingtip ba tikna halor ka jingdon jong ki briew kiba thmu ban pynpoi ïa u drok sha ka jylla, ki pulit ki la pynlong ïa ka jingpynap shrip hajan jong ka thanat Byrnihat. Kumta dei tad haduh ka por 7 baje janmiet ba la ïoh ban bat noh ïa kawei ka kali Maruti Alto kaba don ïa u number ML05-M-7648.
Ha ka jingtalasi ïa katei ka kali, ki pulit ki la ïoh ban kurup ïa u drok Heroin uba khia kumba 140.37 gram uba la song bha ha 24 tylli ki jingsop sabon bad uba la buhrieh hapoh ki bynta jong ka jaka shong (seat) katei ka kali. Nalor u drok, ki pulit ki la ïoh ruh ban kurup lai tylli ki mobile phone, ka pisa T.4000, lai tylli ki identity card lem bad uwei u thyrnia.
Halor kane ka bynta ki pulit ki la kem noh ïa ki lai ngut ki briew kiba donkti ïa kiba la tip kyrteng kum u Bijay Thapa na Ladnartiang, u Banshngaiñ Kupar Khongdup na Umkdait Nongmensong bad u Dilip Mawlong na Nongmensong. Ïa kine baroh lai ngut la pynngat ha ki kyndon aiñ jong ka Narcotic Drugs and Psychotropic Substances (NDPS) bad ka jingtohkit ban lapdien shuh sa ïa kiwei kiba donkti ka dang ïaid shakhmat.
