New Delhi, Lber:
Na ka liang ka synjuk ba khlieh duh ia ka jingialehkai kriket hapoh ka ri India ka Board of Control for Cricket in India (BCCI), ka pynbna paidbah mynta ia ka thup kyrteng kaba jrong jong ki rang-ialehkai kiba lah shah pynkup burom mynta da ka ‘Central Contract (CC)’ na ka bynta ka aiom ialehkai 2022-23.
Kumta katei ka jingpynbna ba mynta da ka BCCI lah iohi ruh ia u rang-ialehkai ba pawkhmat jong ka kynhun ialehkai ka ri uba tbit ban ialehkai ha baroh ki liang jong ka jing-ialehkai u Ravindra Jadeja, u kylla long mynta kum uwei na ki nongialehkai ban shah siew ha ka dor kaba heh. Une u nongialehkai u lah shah pynkhmati mynta da ka A+ Kontrak namar ka jinglah jong u ban ialehkai bha ha baroh ki bynta jong ki lympung ialehkai kiba u shim bynta.
Hynrei ha kawei ka liang ka long ruh ka jingduhnong kaba khraw na ka bynta kiwei pat ki rang-ialehkai ka ri naba u KL Rahul u lah shah pynhiar kyrdan mynta na ka A sha ka B. Shuh shuh ruh ki don bun ngut kiwei pat ki rangialehkai kiba lah shah iehnoh shi syndon na ka jingpynrung ia ki kyrteng jong ki ha ka thup; kata ka kynthup ruh ia u Bhuvneshwar Kumar, Ajinkya Rahane, Ishant Sharma, Wriddhiman Saha, Deepak Chahar bad Hanuma Vihari kiba lah shah iehnoh syndon shadien mynta na ka thup jingiateh baroh kawei. Na kitei, u Saha, Ishant bad Rahane ki long ki rangialehkai ki bym shym la ioh bynta shuh ha ka skhim jong katei ka jingiateh kontrak.
Kumjuh ruh u Bhuvneshwar u lah ialehkai khyndiat tylli ki jingialehkai ha ki lympung iakhun ba khyndiat over dang ha ki por ba lah leit, hynrei katto katne na ki rangialehkai lah iohi ba ki la lah ban tam noh ia u sha ka kyrdan ba shajrong.
Haduh mynta u Deepak Chahar u dang iai shah jied kum u nongialehkai bahajrong eh ha kaba iadei bad ka sap ialehkai ka jong u, hynrei ka jingmynsaw ka lah pynlong ia u ban hap kiar noh na ka bynta ban long u shibynta jong ka CC napdeng ki nongkawang bol pace ka kynhun ialehkai ka ri. Kumta ruh u Hanuma Vihari uba long u rangialehkai ba pawkhmat na ka bynta ka kynhun ialehkai Test ka ri, ha ka thup ba mynta lah shem ba u lah shah pynhiar kyrdan noh.
Katba katei ka thup kyrteng ba thymmai ka dang iai tyllun shakhmat, u Deepak Hooda, KS Bharat bad Arshdeep Singh ki long kiwei pat ki kyrteng kiba lah ioh ban kamai mynta ia ka hok ba ki dei ban ioh kata ka jingshah kynthup ka jong ki ha ka kyrdan Grade C.
Ka thup kyrteng ba thymmai jong ka CC na ka bynta ka aiom 2022-23:
Grade A+: Rohit Sharma, Virat Kohli, Jasprit Bumrah, Ravindra Jadeja
Grade A:Hardik Pandya, Ravichandran Ashwin, Mohammad Shami, Rishabh Pant, Axar Patel
Grade B:Cheteshwar Pujara, KL Rahul, Shreyas Iyer, Mohammed Siraj, Suryakumar Yadav, Shubman Gill
Grade C:Umesh Yadav, Shikhar Dhawan, Shardul Thakur, Ishan Kishan, Deepak Hooda, Yuzvendra Chahal, Kuldeep Yadav, Sanju Samson, Washington Sundar, Arshdeep Singh, KS Bharat.
