Khliehriat, Lber 27:
Sa ar ngut ki briew kiba na Tripura ki la shah kem noh ha ki pulit ryngkat bad u kynja (Ganja) ba khia haduh 66 kilo tam ba la ïoh kurup na ka kali kaba ki shong ha East Jaiñtia Hills.
Ki pulit ha ka janmiet ka 26 tarik mynta u bnai ki la ïoh kem ïa kitei ar ngut ba la tip kyrteng kum u Rabi Debbarma 43 snem na RM Thakur para, Ranir Bazar, Jirania West Tripura bad u Amarjit Debbarma 19 snem na Surendra nagar, Dasherghat, Baikunthapur, West Tripura. Kine ki la shah kem ha ki pulit jong ka East Jaiñtia halor ka jingdonkti ban khaiï beaiñ ïa u Ganja ba khia 66.829 kilo ba kit ha ka kali jong ki, ka Mahindra KUV 100 kaba don ïa u number TR-07-B-0422.
Ki pulit ki ïathuh, ha ka por kumba 7:45 eiei janmiet jong ka Sngi U Blei, ki pulit jong ka Umkiang PP ha ka por ba ki khynra kali ha Damcherra, Kuliang ka surok bah NH-6, ki la phah sangeh ïa katei ka kali bad ha ka por ba khynra ïa katei ka kali la lap ïa ki jingsong ba la buhrieh hapoh ka kali.
Kumta la kem noh ïa kitei ar ngut hadien ba la pyndep ïa baroh ki jingdonkam katkum ka NDPS Act bad ki pulit ki la pynrung ïa ka case ha thanat Lumshnong katkum ka Case No. 18(3)2023 u/s 21(b)(ii)(c)/29 NDPS Act.
Na kitei ar ngut kiba la shah kem, ki pulit ki la ïoh kurup ruh ïa 2 tylli ki Mobile Phone bad 2 tylli ki Sim Card.
