Nongstoiñ, Lber 28:
Ka shlem treikam jong ka Hima Nonglang Sirdarship ka la shim ïa ka sienjam ban wanlam ïa ki 25 ngut kiba shah pyndik bad shah thwet ha ki pulit ka Assam kiba dei ki nongshong shnong na ka shnong Malchapara kaba hap hapoh ka Hima Nonglang sha ka shlem treikam ka hima ban phah sah ïa ki ban lait na ka jingleit phet sha ki khlaw ki btap.
U Vinat Sangma u la ïathuh ba ka la mih ka jingïakajia namar kita ki kynhun 35 ïing ki la khang ban leit ïalehkai kriket ha ka madan shnong ïa kiwei namar ki ong ba ïa katei ka madan la aiti sha ka Assam hadien ba la pynbeit ïa u pud u sam lyngba ka MOU ha u snem ba la dep.
U Secretary ka Hima Nonglang, u Bah Birbor Riangtem u la ong, ka Hima Nonglang ha ka Sngi Ba-ar hadien ka jingïoh ïa ka jingujor na ki khun ki raïot kiba don hapoh ka shnong Malchapara, ka la leit sha katei ka shnong ban leit peit leit khmih ïa ka jingïakynduh jingeh bad ka jingjynjar jong ki nongshong shnong hadien ba ki bor pulit na Assam ki la leh donbor ïa ki da kaba wan kem ïa ki ha ka por mynmiet.
U Bah Birbor u la ong, kane ka jingleh ki pulit Assam ka la pynlong ïa ki arphew san ngut ki khun shnong ban shu hap phet rieh sha khlaw sha btap khlem bam khlem dih mynta la artaïew. Dei halor kata ka nongrim na ka liang ka hima ka la ïa kut ban leit khmih bad haba la poi sha katei ka shnong la lap shisha bad la isynei ïa ki khun shnong khun thaw kiba hap ban phet sha ki khlaw ki btap.
Nalor kata, u Bah Birbor u la pynpaw ruh da kaba ong, “Kaei kaba ka hima ka pyrkhat kum ha kine ki bnai ba la dep, ka long ba ngim kwah ba ki khun ki raïot ki jong ngi kin long ’langkñia kumba long ki briew ha Mukroh. Dei na kata ka daw ngi shim ïa ka sien jam ban wanlam ïa ki ha ophis ka hima ban ïa kaba ki don sha khlaw ba kin ïoh ïa ka jingïada ka jingshngaiñ ha ka bam ka dih ha ka thiah ka dem ban lait na ka jingleit phet bad pher na ka jingdon ka jong ki sha khlaw.”
Une u nongïalam ka hima u la ong, ba kitei ki khun ki raïot kin don ha ka shlem treikam jong ka hima tat haduh ba ka sorkar kan leh eiei halor katei ka jingshem jynjar jong ki briew ha ka shnong Malchapara.
Shuh shuh u la ong ruh ba ha kine ki khyndiat sngi ba la dep na ka liang jong ka hima hadien ba ka la ïoh ïa ka jingujor na kitei ki shnong ka la leit ban ai da ka jingthoh sha u Deputy Commissioner ka West Khasi Hills. Na ka liang u Deputy Commissioner, u la kular ban leh eiei da kaba u la phah ïa u SP ban leit peit sha katei ka jaka, hynrei haduh mynta ym ïohi dak eiei ïa kata ka jingshimkhia jong u DC. Kumta na ka liang jong ka hima kam banse ban ïada ïa la ki jong ki briew ki khun ki raïot ka hima da kaba la wanlam ïa ki sha ka shlem treikam ka Hima.
“Ka jingkyrpad na ka liang ka hima ïa ki nongmihkhmat kiba la kular ban ïada ïa ki paidbah nongshong shnong na kano-kano ka jingjynjar, kumta da ka jingsngew rit na ka liang ka hima ka kyrpad ïa ka sorkar ba kin leh noh kloi-kloi namar ka jingïarap ka jong phi hadien ka jingkhlad noh ka jingim kan nym myntoi satia,” la ong u Babu Birbor.
