Shillong, Lber 28:
Ka lympung ïalehkai Super Division Shillong Cricket League 2022-23 ba la pynïaid da ka Shillong Cricket Association ka la nangjam shaphrang ha kaba ka Rangkynsai C.C ka la khur ïa ka jingjop pyrshah ïa ka Langsning XI C.C da 6 wiket ha ka sngi Ba-ar ha madan Polo.
Ha kane ka jingïakhun, ka Rangkynsai kaba la jop ïa ka jingkynting pisa ka la ailad shwa ïa ka Langsning ba kan tied nyngkong. Ka Langsning haba wan ban tied ka la kamai 162 run bad shah pynkhyllem 10 wiket ha ki 35 over. U Heimon Lyngdoh u la tied 33 run na ki 19 bol bad u Eeeshant Kumar Chettri u la tied 19 run na ki 18 bol. Katba u Rohit Rai u la khur 3 wiket bad ïa ki 2 wiket la khur da u Shavian Blah na ka bynta ka Rangkynsai.
Haba wan shimti ïa ka pali kaba ar, ki nongtied ka Rangkynsai ki la ïakhun tyngeh na ka bynta ban pynurlong ban kynjoh sha ka thong da kaba lah kamai 163 run bad shah pynkhyllem 4wiket ha ki 36.5 over. U Rahul Shah u la ïoh ban tied 47 run na ki 42 bol bad u Pynhunlang Kharnarbi u la tied 34 run na ki 59 bol. Katba u Eeeshant Kumar Chettri u la khur 2 wiket bad ïa ka shi wiket la khur da u Deibormi Rangad na ka bynta ka Langsning. Ïa ka nam ‘Man of the Match’ la khur da u Rahul Shah.
