Shillong, Lber 28:
U Symbud Myntri Rangbah ka Jylla ba khmih ïa ka tnat Kam Pohïing, u Bah Prestone Tynsong, ha ka Sngi Ba-ar u la ong ba khnang ban lah ïaleh ïa ka mat jong ka jingpynkheiñ ïa ki kyndon aiñ ñiah kali (traffic violations) hapoh ka nongbah bad ha ka jylla, ki pulit ka jylla ki la pynkylla ïa ka rukom treikam na ka jingshaniah ha ka jingshakri jong ki pulit sha ka jingpyndonkam da ki kor teknoloji.
Ki kor teknoloji ba ka tnat ka la pyndonkam mynta ki dei ka e-Challan Digital Traffic Solution, kaba pynsted ïa ka jingdaiñ kuna ïa kiba pynkheiñ aiñ bad ka jingbuh ïa ki “khmat na suiñ” ne ‘Eyes in the Sky” lyngba ki drone da ka jingbuh ïa ka Drone Control Room ha East Khasi Hills bad West Khasi Hills, ki ban khmih ïa ka jingïaid kali khamtam ha ki kynta ba thnem ka leit ka wan, la ong u Bah Prestone.
U Symbud Myntri Rangbah u la pyntip ïa kane haba jubab ïa ka ‘Call Attention’ ba la wanrah da u MLA ka Congress na Mylliem u Bah Ronnie V Lyngdoh hapoh ka ïingdorbar ha ka Sngi Ba-ar.
Haba pynpaw ïa ka jingsngewkhia halor ka jingdheng kali ha Upper Shillong, u Bah Prestone u la ong ba ka jingdheng kali ha kane ka surok ka dei kaba la shah ktah na ka jingpynheh ïa ka surok. Hynrei, ka Shillong Traffic Police (STP) ka la trei shitom ban pyntikna ïa ka jingïaid beit jong ki kali bad ïaleh katba lah ban pyllait kloi na ka jingdheng kali.
U la pyntip ba ka jingpynïaid ïa ki kali na MES Point (Rilbong) sha 7 Mer Upper Shillong ka hap hapoh ka jingkhmih jong ka Lumdiengjri Traffic Branch. Kane ka Traffic Branch ka don uwei u Inspector, 5 ngut ki Sub Inspector, 5 ngut ki Head Constable bad 38 ngut ki Constable.
Ïa kine ki nongtrei ka Traffic Branch la buh ha MES Point (Rilbong), lad 3 Mer Upper Shillong bad lad 7 Mer Upper Shillong. Kine nongtrei ki sdang trei ïa ka kam naduh ka por 7 baje mynstep haduh ka por 9 baje mynmiet, ïa kaba la pynjlan ruh ha ki khep ki khep katkum ka jinglong ka ïaid ka ïeng ki kali.
Nalor kane, u Symbud Myntri Rangbah u la ong, nalor ka jingpynïaid ïa ki kali ha kine ki 3 tylli ki jaka ba donkam, kine ki pulit pynïaid kali ka Lumdiengjri Traffic Branch ki hap khmih ruh ïa ka jingpynïaid kali ha kiwei pat ki jaka ba kongsan kiba hap ha u pud u sam jong ka. U pyntip ba kane ka tnat ka la ïoh ruh ïa ka jingïarap jong ka Flying Squad ban pyllait kloi ïa ki kali haba don ka jingdheng ne suki ka rukom ïaid ki kali.
Hashwa kane, haba wanrah ïa ka ‘call attention’, u Bah Ronnie V Lyngdoh haba pynpaw ka jingsngewkhia, u la ong ba ka jingdheng kali kam dei shuh kaba shisien lano, hynrei ka dei kaba jia man ka sngi ha ki bynta ka surok na jingkieng Umshyrpi shaduh 7 Mer bad buh jingeh shi katdei eh ïa ki nongleit nongwan.
“Ka la shim por haduh 45 minit ïa nga ban poi sha ïingdorbar, kata ruh hadien ba nga la shim ‘pass’ ïa ki kali, te katno tam lei ïa ki nongleit nongwan, kiba sahkut da ki kynta ha kane ka surok. Kumta ka sorkar ka dei ban shimkhia ban wad ki lad lynti kumno ban pyllait ïa ki nongleit nongwan na kane ka jingeh,” la ong u Bah Ronnie.
