Dehradun, Lber:
Ki nongrep ha Rajasthan bad Madhya Pradesh ki la dawa na ka sorkar ba ka la dei ban ai ka bailutksan kaba ïabiang bad ka jingjulor jong ki jingthung na ka jingwan hap jong u slap bad u phria. Ki nongrep ki la pynpaw ïa ka jingsngewsih kthang halor ka jingjulor jong ki jingthung jingtep hadien ka jingwan hap jong u slap u bym dei por ha ka jylla.
U slap ha ryngkat u phria bad kumjuh ka lyer kaba jur ki la pynjulor ïa ki jingthung jingtep ha ki lyngkha kiba bun ha kaba ka la wanrah ka jingduhnong kaba jur ïa ki nongrep. Ki la don kumba katto katne ngut ki nongrep kiba la ïathuh ba ki la trei shitom miet la bat sngi na ka bynta ban pynbiang ïa ki jingpyntreikam ha ka lyngkha na ka bynta ban rep bad thung jingthung ha kaba ka la pynpang met ïa ki haba ki ïohi ba ki jingthung jingtep ki la shah pynjulor na ka jingwan hap jong u slap.
Ha kaba ïadei bad kane, ka la long ka jingduhnong kaba jur da ka jingwanhap jong u slap uba khlem dei aïom ban wan hap ha ryngkat u phria naba baroh ki jingthung jingtep ki la julor lut. Shuh shuh ki nongrep ki la pynpaw ba ki don ka jingkyrmen ba dei sa tang ka sorkar ka ban lah ban shim ka jingkitkhlieh halor kane ka bynta bad ban khmih bniah halor ki jingjulor jong ki jingthung jingtep na ka jingwan lynshop ki bor ka mariang.
Hadien ba la dep ka jingkhmih bniah, a sorkar ka la dei ban pynbna ban ai ïa ki bailutksan sha ki nongrep, ki la ong. Ki nongrep kim lah khlem da jaw ummat haba ki ïakynduh jingeh ha kum kane ka por ha kaba ki la pynpaw ïa ka jingkutlad bad ka jingduhnong kaba jur. Kiba bun kiwei pat ki jaka ha ka jylla ki la ïoh ïa ka jinghap slap ha kaba ka la wanrah ka jingduhnong ha kiba bun ki jaka khamtam ïa ki mar rep.
