Shillong, Lber 28:
Ka shlem treikam jong ka Mission Director ka National Health Mission ka sorkar jylla ha ka sngi Ba-ar ka la rakhe ïa ka World Tuberculosis Day kaba la long ha u Soso Tham Audutorium bad ka phang pdeng mynta u snem ka dei “Yes! We Can End TB” lane “Hooid! Ngi lah ban pynkut ïa ka jingpang TB”.
Ka kongsan ha katei ka sngi ka dei ka Kong Ampareen Lyngdoh kaba dei ka Myntri ka tnat ka koit ka khiah ka jylla bad la ïoh ruh ïa ka jingpdiang sngewbha na ka Dr. SS Nongbri kaba dei ka Joint Mission Director, NHM ka jylla, ka jingkren lyngkot na u Ramkumar S, IAS, Mission Director, NHM, ka Dr. H Lyndem kaba ka DHS (MI) bad u Sampath Kumar, IAS, Principal Secretary ka Health and Family Welfare.
Ha katei ka sngi la ïoh ruh ïa ka jingrwai na ki Staff Nurse ka RP Chest Hospital, ka jingai ïa ka jingphla da ka nongpang kaba la koit na ka jingpang TB, ka jingaikhublei na u Dr. M Mawrie u ba dei u State TB Officer bad kiwei kiwei de ki prokram.
Haba ai jingkren ha katei ka sngi, ka Kong Ampareen ka la ong ba ka jingpang TB kam dei ka jingpang kaba ktah tang ïa u duk u suk hynrei ka dei ka jingpang kaba ktah ïa baroh hynrei kiba kham riewspah ki don ïa ka pisa ban ïaleh bad utei u khñiang jingpang.
“Ka jingpang TB kam da dei than eh kata ka jingpang kaba long ka nongpynïap kaba khraw katkum ka jingïohi ka jong nga kum ka nongmihkhmat,” la ong ka Kong Ampareen.
Ka Kong Ampareen ka la ong ban rat dyngkhong ïa ka jingpang TB hapoh la jylla ka donkam ka jingïatreilang na baroh ki liang bad kum ka Myntri hapoh ka sorkar bathymmai kata ka Meghalaya Democratic Alliance (MDA 2.0) hapoh ka jingïalam jong u Myntri Rangbah ka jylla, u Conrad K Sangma bad ki kynhun Myntri, ka la ai khublei ïa baroh ki doktor kiba ai ïa ka jingshakri met bad mynsiem sha ki nongpang TB hapoh ka jylla.
“Phi dei ki nongïalam kiba lah ban ïalam ïa ngi sha kata ka thong ban rat dyngkhong ïa ka jingpang TB bad ban ong ba ngi lah ban pynkut noh ïa ka jingpang TB ha u snem 2025,” la ong ka Kong Ampareen.
Shuh shuh ka la ong ba ki paidbah nongshong shnong ki dei ban weng noh ïa ka jingpyrkhat ba ka sorkar ka lah ban leh lut ma ka hynrei ki dei ban buh ïa ka jingmut ba ka sorkar nalade shimet kan nym lah ban leh eiei lada khlem ka jingïatreilang bad ka jingïasnohkti lang da ki paidbah nongshong shnong ka jylla khnang ban wanrah ïa ka jingkylla.
