Shillong, Lber 28:
Ka nongbah Shillong ka la ïoh ban pynlong ha ka sien kaba nyngkong eh ïa ka jingpyntbit na ka bynta ki nongbishar (judges course) jong ka National Rifle Association of India. Ïa kane la sdang ha ka sngi Ba-ar ha kaba ki la don 25 ngut kiba la wan ïashim bynta na kylleng ka ri India ba kynthup ruh na kane ka jylla.
Ïa kane ka prokram la plie da u Director ka tnat ïalehkai jong ka Sorkar Jylla u Vibhor Agarwal ha ryngkat ka jingïatrei lang bad ka Shooting Association of Meghalaya ha State Convention Centre kaba long hynne ka sngi (sngi ba-ar).
Haba ai jingkren ha kane ka sngi u Agarwal u la ai khublei ïa ka NRAI kaba la jied ïa ka nongbah Shillong kum ka jaka na ka bynta ban pynlong ïa kane ka prokram.
Ki la don 25 ngut ki nongïashim na kylleng ki jylla jong ka ri kiba la wan ïashim bynta ha ka sien kaba nyngkong eh ha ka C-Level NRAI Judges Course. Kine nongïashim bynta ki la wan na Assam, Bihar, Gujarat, Himachal Pradesh, Jammu & Kashmir, Karnataka, Meghalaya, Mizoram, Manipur, Odisha bad na West Bengal.
Ki nongïashim bynta na ka Jylla ki long ka Balarishisha Rani, Davis NR Marak, Anjali Singh bad u John Thounaojam.
Kat kum ka kyrwoh ba la pyllait da u General Secretary ka SAM u Bah Neil Sootinck, la ong ba ka education wing jong ka NRAI ka la buh ïa ka thong ba ha kine ki san snem kan pynmih haduh 9,000 ngut ki coach bad 600 ngut ki nongbishar (judges) khnang ban lah sei ïa ki nongïalehkai siat suloi ha kylleng jong ka ri. Kumba ka long mynta ki la don haduh 90,000 ngut ki nongïalehkai siat suloi kiba la pynrung kyrteng bad ka NRAI.
Ha kawei pat ka liang u Director ka Education Programme jong ka NRAI bad u Joint Secretary General u Pawan Singh u la ai khublei ïa ka SAM bad ka DSYA kiba la kloi ban pynlong ïa kane ka prokram. U la bynrap ruh da kaba ong ba kane ka synjuk kan ïoh ban pynlong ïa kiwei pat ki prokram kum ka high altitude training.
U Henry Oka, uba long u nonghikai ka International Shooting Sports Federation uba na Indonesia, u la khmih lynti ba ki nongïashim bynta kin ïoh ka jingmyntoi kaba khraw ha kine ki lai sngi. U la ai khublei ruh ïa ka SAM lem bad ka NRAI kiba la lah ban pynbiang ïa baroh ki jingdonkam nalor ka mariang kaba pyngngad.
Hashwa ban sdang kane ka prokram la ïoh rung ka jingkren pdiang sngewbha na u Bah John F. Kharshiing, President ka SAM bad uba long ruh u Vice-President NRAI.
Ha kawei pat ka liang ki nongïalam ka NRAI ki la khot sngewbha ruh ïa u Commissioner jong ka tnat Sports & Youth Affairs u Vijay Kumar D, na ka bynta ban ïamir jingmut lang khnang ban pynlong ïa ka Meghalaya ba kan ïoh ban pynlong ïa kiwei pat ki prokram ba kongsan jong ka NRAI.
