Shillong, Lber 28:
U Symbud Myntri Rangbah ka Jylla ba khmih ïa ka tnat Pynroi Sor, u Bah Sniawbhalang Dhar, u la ong ba ka pisa baroh kaba la pyllait haduh ba kut jong u bnai Rymphang, 2023 ka long T.349 klur na ka bynta ka jingpyntreikam ïa ka projek Smart City ha nongbah Shillong.
Kane ka pisa ba la pyllait ka kynthup ïa ka Grant na ka Sorkar India kaba long T.294 klur bad ka bhah na ka Jylla kaba long T.55 klur, la ong u Bah Sniawbhalang haba jubab ïa ka jingkylli ba khlem ïatai (unstarred), kaba la wanrah ha ka ïingdorbar ha ka Sngi Ba-ar.
Shuh shuh ha ka jubab ba khlem ïatai ba la buh ha kane ka dorbar mang tyngka, u Bah Sniawbhalang u la ong ba ka nongbah Shillong ka la shah kynthup hapoh ka projek Smart City bad ka jingbhah pisa kan dei 50:50.
U la pyntip ba kat haduh u bnai Rymphang 2023, la dep ban pynlut haduh T.280.98 klur bad ki projek kiba la pyntrei hapoh ka Smart City projek ki don haduh 18 tylli.
