Paris, Lber:
Ka aiom ialehkai pynmareh thuk-thuk bathymmai kaba lah nang iaid shakhmat mynta ka MotoGP ha Portugal bad u Carmelo Ezpeleta u khliehduh ka Dorna uba long ruh u Sport’s promoter, u pynpaw mynta ia ka jingthmu kaba u don na ka bynta ban pynpawnam ia katei ka lympung ialehkai wat ha India bad Kazakhstan ruh kumjuh.
Kumta da ka jingpynrung shuh shuh ia ki ar tylli ki jingpynialehkai kaba lah rah mynta ia ka almanak jong ka aiom ialehkai ba mynta sha ki 21 tylli ki jingpyniakhun, ka don ia ka jingthmu na ka bynta ka jingnang iai pyniar shuh shuh ia ka jingpynbun nongialehkai na ka 19 sha ka 22 ki ban wan na ka thain Europe.
Shuh shuh ruh ka khubor ka iathuh ba ka jingpynialehkai ha Kazakhstan kan long ha Sokol International Racetrack hajan Almaty ha ka 9 tarik u Naitung mynta u snem katba ka madan ialehkai ba pawnam bha ha ri India ka Buddh International Circuit kan pynlong ia ka lympung MotoGP kaba nyngkong eh ha ka 24 tarik u Nailur.
Kita ki ar lympung ialehkai ki mut 10 jong u 21 une u snem ba mynta ia kaba yn pynlong ia ki Shabar jong ka Europe, hynrei u Ezpeleta u iathuh ba kin dang shuh shuh ki jak ana ka bynta ki Non-European Races naba ki don ia ka thong bad ka jingthmu na ka bynta 22 tylli ki jingpynialehkai ha ka pateng ka ban wan.
Ha kane ka aiom ialehkai ba mynta sa kawei pat ka kynhun kaba hapoh ka jingmihkhmat sha ka MotoGP Grids ka dei jong ki kynthei bad ka Ana Carrasco kaba lah dep ban iasoi na ka bynta ka kynhun BOE SKX ha ka Moto3, kan long tang ma ka marwei napdeng kiwei pat ki thei ialehkai ka ban ia aireng ha kano na ki lai kyrdan ialehkai jong ka aiom ba mynta.
Na ka liang jong u Ezpeleta u pynpaw ruh ia ka jingkwah jong u ban iai pynneh pynsah ia ka thong kaba u don kata ka MotoGP ka kwah ruh ia kata ka “Reduce our Carbon Footprint”, kaba long kaei kaei kaba ki lah dep ban sdang da kaba pyrshang ia ka tei ka bynta ha ki katto katne ki group.
