Shillong, Lber 28:
U Myntri Rangbah ka Jylla, u Conrad K. Sangma ha ka Sngi Ba-ar u la pyntikna ba ka jingpynlip bording kan ïaid beit shakhmat, hynrei yn ïaleh katba lah ban pynduna khnang ba kan ym ktah than ïa ki paidbah.
“Kane ka dei ka mat kaba la don la slem, hynrei mynta u snem ka la kham manbha khyndiat naba ka jinglip bording kam shym la don ha u Rymphang, Lber. Ngi ju ïohi ba ka ju don ka jingpynlip bording ha u Lber ne ha ki kut tarik jong u Rymphang,” la ong u Sangma haba kren sha ki lad pathai khubor.
U la ong ruh ba haba ïanujor mynta u snem bad ki snem kiba la leit, la ïohi ba ka la don khyndiat ka jingbha namar ka rukom pynbeit kam bad ka tnad bording ha ki 2 snem ba la dep, ha kawei ka liang kaba la ïalam sha ka jingpynbit pynbiang jong ka jinglong-jingman ha ka bording.
Haba kubur ba ka don ka jaka ba thylli, u Myntri Rangbah u la ong ba yn ïaleh ban pynduna ïa ka jingpynlip bording khnang ba kan ym ktah than eh ïa ki paidbah.
U la pynsngew ruh ba ka jingpynlip bording kan long ha kata ka rukom khnang ba katto-katne ki jaka kin ym shah ktah ha katto-katne bynta jong ka sngi da kaba buh jingmut ïa ka jinglong-jingman ka suiñ bneng, ki prokram bad kiwei-kiwei.
“Ngi la buh jingmut ïa kine bad ngin pynduna ïa ki jingeh, hynrei ngin hap ban pynlip bording namar ka jingduna ha ka bording kaba ngi don mynta,” u la ong.
Haba kylli, u Sangma u la ong, “Kane ka ju jia, ki ju pynsangeh teng-teng ban pynbit-pynbiang, teng-teng ki ‘Unit’ ki sniew, kumta ka jingpynbit pynbiang ka don beit.”
Ka Meghalaya Power Distribution Corporation Limited (MePDCL) ka la sdang ïa ka jingpynlip bording lane ka ‘load shedding’ naduh ka miet jong ka Lah Sngi U Blei hadien ba ka la don ka jingthut ha kawei ka ‘Unit’ jong ka OTPC Power Station ha Tripura.
Kane ka jingpynlip bording kan long hapdeng ki kynta jong ka miet 27 tarik Lber haduh ka miet jong ka 29 tarik Lber ha ki jaka bapher-bapher namar ka jingduh ba kynsan jong katei ka ‘Unit’ ha Palatana.
Ka Meghalaya ka ju shim bording kumba 35 MW na Palatana bad da ka jingsniew noh jong katei ka ‘Unit’, la hap ban pynlip noh ïa ka bording.
Ïa mynta, ka jingpynlip bording kan long naduh hapdeng ki kynta jong ka miet 27 tarik haduh ka miet jong ka 29 tarik Lber, bad hadien kata, ka MePDCL kan sa peit la dang donkam ne em ban pynlip bording.
