Shillong, Lber 28:
Ka Meghalaya Pradesh Congress Committee (MPCC) ha ka Sngi Ba-ar ka la pynlong da ka jingïakhih ha Congress Bhawan kum ka dak ban pynrem halor ka jingshah mait kyrteng u nongïalam ka seng, u Rahul Gandhi na ka jinglong dkhot ka Lok Sabha.
“Kane ka dei ka jingïakhih jong ka Congress hapoh ka Jylla, ngi pynrem jur halor ka jingshah mait kyrteng u Rahul Gandhi. Kane ka long ka jingkhñiot ïa ka hok synshar paidbah, ka jingkhñiot ïa ka hok ban kren bad pynpaw, da ka Sorkar NDA hapoh ka jingïalam u Narendra Modi,” la ong u MLA ka seng, Bah Ronnie V. Lyngdoh haba kren sha ki lad pathai khubor.
U la ong ruh, “Ki kwah ban khñiot ïa ka hok kaba u nongïalam jong ngi u la pynsngew hapoh Parliament, ha ki rynsan bapher-bapher halor ka jingbym biang ka synshar-khadar, ka jingpyrshang ban pynïap ïa ka synshar paidbah bad wat ban leit shaduh u pud ban mait kyrteng ïa u nongïalam ka Congress na ka jinglong dkhot ha Parliament.”
U Bah Lyngdoh u la ong ba kane ka dei ka bym pat ju jia ne ïohi koit ha ka pyrthei ha kaba u nongïalam uba la shah jied lyngba ka synshar paidbah u shah mait kyrteng lyngba ki rukom ki bym dei.
Haba kylli, u la ong ba ka seng ka sngewkhia ïa kaei kaba ka sngew, hynrei kam khuslai ïa ka jingsngew kiwei naba ki don la ki jong ki jong ki jingpynsngew.
Haba pynpaw ka jingpyrshah jur bad jingpynrem ïa ka jingleh ka Sorkar u Modi pyrshah ïa u nongïalam jong ki, u Bah Lyngdoh u la ong, “Ki la sheptieng, kyiuh na ka jingkyrshan ba la ïoh na ki paidbah ha kylleng ka ri ha ryngkat ka ‘Bharat Jodo Yatra’ ha kaba ngi pyntikna ba khlem da kheiñ ïa ka kyrdan, niam ne jinglong briew, baroh ngi dei ki nong India bad kane ka dei ka khubor kaba ngi phah.”
Haba kdew ba ka Sorkar NDA ka im da kaba wanrah ïa ka jingsngewpher jaidbynriew, ka jingïashrut, la ka long ha ka kyrdan, niam ne jinglong briew, utei u nongmihkhmat ha kawei ka liang u la ong ba u nongïalam ka seng, u Rahul Gandhi u ngeit ban pynïatylli ïa ka ri khnang ban im suk im saiñ namar ka India ka dei ka ri kaba ngeit ha ka jingïatylli.
Shuh shuh u la bynrap, “Ngim shym la lah ban pynlong bha ïa ka jingïakhih namar ngi bunkam ha ka Dorbar Mang Tyngka. Ngin ïai bteng ïa ka haduh ban da ïoh ïa ka hok.”
