Bhopal, Lber:
Ki la don kumba 65 ngut ki briew, kynthup ki khynnah, kiba la kem pang hadien ba ki la bam ïa ka jingbam ba la tip kum Sabudana khichdi ba la shet ha Bhandara ha ka sngi ba la pynlong ïa ka Gangaur Puja ha Khargone distrik kaba don ha Madhya Pradesh.
Kine ki briew ki la prie bad pynhiar namar ka jinglong bih jong ka jingbam ba ki la bam bad ki la shah pynkit sha ka District Hospital bad sha ka jaka ai jingsumar kaba don hapoh shnong na ka bynta ka jingshah sumar.
U Dr Amarsingh Chauhan, uba long u Civil Surgeon jong ka District Hospital, u la ong ba ki la don kumba 15 ngut ki nongpang kiba la shah pynkit sha ka jaka ai jingsumar hadien ba la ïoh jingtip ba ki la bam ïa ka jingbam kaba la long bih.
Kumba la ïathuh ka tyllong khubor la ong ba kine mynta ki la kham ïoh ïa ka jingkoit. Ki la don kumba 35 ngut ki nongpang kiba la shah pyllait noh hadien ba ki la ïoh ïa ki jingsumar. Kumba la ïoh jingtip, la ong ba ka la don kawei ka jaka bam ba lah ban ïoh ïa ka Sabudana Khichdi ha ka sngi ba la don ka Gangaur Puja.
Ha kaba ïadei bad kane, tang hapoh ki ar kynta ba la dep ban bam ïa ka Sabudana Khichdi, kine ki briew ki la sdang ban prie, pynhiar. Hadien kane, ki nongshong shnong ki la ai jingtip halor kane ka jingjia sha u Collector u Shivraj Singh Verma. Ka kynhun jong ka tnat ka koit ka khiah ka la poi ha katei ka shnong hadien ba ki la ïoh jingtip halor ka jingjia na u DM.
Ki la don kumba 40 ngut ki briew kiba la shah sumar ha ka jaka ai jingsumar kaba don ha katei ka shnong bad 15 ngut kiwei pat ki la shah pynkit sha Khargone District Hospital. Kumba la ïathuh la ong ba kine baroh ki la kham koit.
