Bhopal, Lber:
U nongialehkai siat Suloi ka ri uba dang iai bat kum u lahduh ha ka pyrthei u Rudrankksh Patil, ha ka lympung ialehkai ba mynta jong ka ISSF World Cup ha Bhopal u la lah ban khur shalade ia ka takma rnong na ka jingiakob siat 10m Air Rifle bad kaba long ruh ka sien ba-ar ba un shimbynta ha kane lympung.
Wat la ka China ka lah nang iai bteng ia ka jingiaid lynti ba seisoh ha kane ka lympung da kaba khur takma ksiar ha baroh ar tylli ki jingialehkai na ka bynta ka sngi kaba ar, hynrei ka long ruh ka ri kaba dang iai bat haduh mynta ia ka kyrdan ba nyngkong jong ka lympung, khamtam haba phai sha ka miej khein takma haduh ba kut ka sngi balai jong ka lympung; kata da 5 takma ksiar, 1 ka rupa bad 2 ka rnong.
Katba ka ri India ka iai sah ha ka kyrdan ba ar hadien ka jinglah ban khur 3 tylli ka takma rnong ryngkat kawei ka takma ksiar bad kawei ka takma rupa.
Ka jingshimbynta biang sa shisien da u tei u rangialehkai ka ri ha ki jing-iakhun kam shym la long kaba suk, khamtam eh ha kum katei ka lympung ialehkai World Cup ha-la-ri lajong, hynrei utei u nongsiat uba long u lahduh kumba u paw haduh mynta, sa shisien u la lah ban ialehkai bha ha katei ka jingiakhun na ka bynta ban khur shalade ia katei ka takma.
