Shillong, Lber 28:
Ka dorbar mang tyngka kaba nyngkong eh jong ka Ïingdorbar Thawaiñ kaba khatwei ka Jylla ka kut noh ha ka sngi ba-ar. Ha kane ka sngi kut la mynjur ruh ïa ka mang tyngka ka Jylla kaba kot palat T.22,022 klur na ka bynta ban pyndonkam ha kiba bun ki jingdonkam bad ki jingpynlut baroh shisnem naduh ka 1 tarik Ïaïong, 2023 haduh 31 tarik Lber, 2024.
Ka jingmynjur ïa ka mang tyngka ka dei hadien ba u Myntri Rangbah u Conrad K Sangma uba peit ïa ka tnat pla tyngka, u la wanrah ïa ka aiñ kaba tip kum ka “Meghalaya Appropriation (No.II) (Demand for Grants for year 2023-2024) Bill, 2023” ha Ïingdorbar ha kaba la mynjur da ka jingpynsawa sur da ki dkhot ka Ïingdorbar kum ka dak ka jingmynjur.
Da ka jingmynjur ïa ka aiñ “Meghalaya Appropriation (No.II) (Demand for Grants for year 2023-2024) Bill, 2023” ka Sorkar Jylla ka la lah ban sei ïa ka pisa kaba la mang T.22022,22,00,000 na ka jaka pynlang pisa jong ka Jylla na ka bynta ban pyndonkam ïa kiba bun ki jingpynlut kiba dei baroh shisnem jong u snem mang tyngka haduh ban kut ha ka 31 tarik Lber, 2024.
Kum ban pynkynmaw, u Myntri Rangbah u la wanrah ïa ka mang tyngka ha Ïingdorbar ha ka 23 tarik Lber, 2023 kaba duna pisa lypa da T.1,592 klur na ka bynta u snem 2023-2024 namar la antad ïa ka jinglut kaba long T.21,034 klur, khlem da kynthup lang ïa ka jingsiew ïa ki ram kaba kot T.988 klur, bad ka jingïoh pisa kaba la mang antad kumba T.19,442 klur khlem da kynthup lang ïa ka jingshim ram kaba kot T.2,339 klur.
Ka jingsiew na ka bynta ki sut ha u snem 2023-24 la mang antad T.1,169 klur bad ki jingsiew kum ka baibam kiba la shongthait kan long T.1,794 klur.
Ka dorbar mang tyngka ka la sdang naduh ka 20 tarik haduh 28 tarik Lber, 2023.
