Shillong, Lber 28:
U MLA ka Voice of the People Party (VPP) na Nongkrem, Bah Ardent M. Basaïawmoit ha ka Sngi Ba-ar u la pan jingshai na ka Sorkar ba mano ba don bynta ha ka ban ai hukum ban pynïap ïa u nongïalam barim ka Hynñiewtrep National Liberation Council (HNLC), Bah Cherishstarfield Thangkhiew ha u Nailar, 2021.
Utei u nongmihkhmat u kwah ruh ban tip la ka Sorkar kan shim ne em ka jingkitkhlieh halor ka jingbym lah ban kem im ïa u Bah Thangkhiew.
“Mano ba la ai hukum ban pynkut ïa u Bah Cherishstarfield Thangkhiew. Yn ym don pulit ba nud pynïap ïa u briew lada um ïoh ïa kaba kum kata ka hukum,” la ong u Bah Basaïawmoit ha ka jingïatai ‘Cut Motion’ halor ka jingtreikam jong ka tnad pulit.
Utei u nongïalam u la ong ruh ba ka Sorkar ka donkam ban sait khuid ïalade halor kane ka mat naba ka snam ka bit ha ki kti ka MDA-I.
Ha kajuh ka por, u la bynrap ba ym dei ban pynlong ’langkñia ïano-ïano da kaba pharep ïa ki briew kiba shu kohnguh ïa ka hukum jong ka Sorkar.
Hashuwa, u la buh jingkylli ruh ïa ka Sorkar ba mano ba donkti ha ka ban pynsniewdur ïa jinglong-jingman ka tnad pulit ka Jylla naba khlem kane ka tnad, ka Sorkar kan ym lah ban pynneh pynsah ïa ka shong suk shong shngaiñ, ban pynïaid kali, ban ai jingïada sha ki nongshong shnong ne ban ïakhun pyrshah ïa ki kam be-aiñ.
U la ong ba ïa mynta ym don shuh ba shaniah ha ka tnad pulit ka Jylla bad kumba ber mluh ha ka jingmong, wat ka ïingbishar ka Jylla ruh ka la pynpaw ka jingbym shaniah shuh ha ki pulit bad khot bujli da ki pulit Central Industrial Security Force (CISF) ban khmih ïa ka jingshalan dewïong be-aiñ.
Ha kawei ka liang u la ong ba kan ym long kaba ïahap ban shu kynnoh than ïa ka tnad pulit ka Jylla naba kane ka tnad ka la lah ban pynjem khnap ïa ka kynhun kieng atiar kum ka HNLC bad ka Achik National Volunteer Council ha ka por ba ki dang khlaiñ bha.
U la ong ruh ba jyn lada ai bor laitluid ïa ka tnad pulit haba ïadei bad u Bah Thangkhiew, katta, la lah ban kem ïa u namar utei u nongmihkhmat u don ka jingshaniah ha ka tnad pulit ka Jylla.
U Bah Basaïawmoit u la kdew ruh ba ka Sorkar ka la phet krad na ki kam kiba ka hap shim ka jingkitkhlieh.
Haba ïashim bynta lang ha ka jingïatai, u MLA Congress na Umsning, Dr. Celestine Lyngdoh u la kyrpad ban pynlaitluid ïa ki pulit kumjuh ban ai lad ba kin leh ïa ka kamram kumba dei ban leh.
U Symbud Myntri Rangbah ka Jylla ba khmih ïa ka tnad kam pohïing, Bah Prestone Tynsong u la ong ba haba ïadei bad ka jingjia ïa u Bah Thangkhiew, la dep ban buh hakhmat ka ïingdorbar ha ryngkat ka kaiphod.
“Ka Sorkar ka la pan jingpynshai na ka kynhun (Tactical-I) bad ngi la ïoh pdiang ha kine ki khyndiat taïew ba la dep. Ngin sa khmih bniah kaei kaba dei ban leh,” la ong u Bah Tynsong.
Halor ka jingwanrah ïa ki pulit CISF hapoh Jylla ban khmih ïa ka jingshalan dewïong be-aiñ, u Symbud Myntri Rangbah u la pynshai ba haba phai sha ki pulit ka Jylla, ki long kiba biang eh ban pyndep la ki kamram.
Haba ïadei bad ka jaidbynriew ‘High-Level’ ba la pynsngew da u Dr. Lyngdoh, u Bah Tynsong, u la ong ba kane ka jingkren ka long kaba bakla bad ka bym dei.
“Kum u nongmihkhmat ba don ka jingkitkhlieh uba la shah jied ha kane ka ïingdorbar, ngam shym la khmih lynti ïa kaba kum kane ka jingkren. Lada phi lah ban sei ïa ki sabut, kam don kaba kum kata, hynrei tang namarba ïohsngew shane-shatai bad ka jingsngewtynnad ban kren, kane kaba bakla. Ka Sorkar da lei-lei kam pdiang ïa kane ka jingkren ba ngi donkam ban thaw sa ïa kawei ka jaidbynriew,” la ong u Bah Tynsong.
