Shillong, Lber 28:
U Myntri ba khmih ïa ka tnat Pule Puthi ka jylla, u Rakkam A Sangma, ha ka Sngi Ba-ar u la pyntip hapoh ka ïingdorbar ba ki don haduh palat 1600 tylli ki kam ba lait jong ki nonghikai ha ki skul bapher bapher jong ka Jylla.
Kane ka jingpyntip jong u Myntri ka la long ha ka por ba u la jubab halor ka jingkylli kaba la wanrah da u MLA ka Congress na Mawhati Konstitwensi u Bah Charles Marngar ha ka kynta kylli jingkylli ha ka dorbar mang tyngka kaba la kut noh ha kane ka sngi.
Na ka liang u Myntri u la pyntip ba ki don haduh 420 tylli ki kam nonghikai SSA ba lait bad haduh 1219 tylli ki kam nonghikai jong ki skul Sorkar.
Ki kam ba lait jong ki nonghikai SSA ka dei kaba la phiah ha ki lai bynta ba kynthup ïa ka Lower Primary kata haduh 102 tylli, ha ka Upper Primary ki don 292 tylli bad ha ka Secondary ki don 26 tylli. Katba ki kam hikai ba lait ha ki skul sorkar ki dei kiba la phiah ha ki saw bynta, kata ka Lower Primary ki don 1002 tylli, Upper Primary ki don 41 tylli, Secondary ki don 125 tylli bad ha ka Higher Secondary ki don 51 tylli.
