Shillong, Lber 27:
Ka National Highways & Infrastructure Development Corporation Ltd. (NHIDCL) ha ka Sngi Palei ka la pyntip sha ka Meghalaya High Court ba ka jingpynslem jong ka sorkar jylla ban aiti ïa ka jaka bad ka jingtuklar ba man la ka por jong ki NGO kiba don jingthmu ba sniew ka la pyntieng ïa ki kontraktor haduh ba ki la iehnoh ïa ka kam bad ki kontraktor bathymmai ruh ki la salia ban wan na ka bynta ban pyntrei ïa ki ar bynta jong ka surokbah ‘Four-Lane’ na Shillong sha Dawki.
Kane ka la paw ha ka por ba ka High Court ka la shong bishar ha kaba ïadei bad ka jingpom dieng ban pynheh ïa ka surok na Shillong sha Dawki kaba kynthup lang ïa ka jingshna ïa ka surok kaba ïaid nalor (Flyover) na Rilbong sha Jhalupara.
Na ka liang u nongmudui u la pynpaw ba watla ka kam ban shna ïa ka ‘Flyover’ na Rilbong sha Jhalupara kam pat sdang eiei, hynrei da ki phew tylli ki dieng ki la dep shah pynkhyllem. U nongmudui u la pynpaw ïa ka jingsheptieng ba kumba ka long ha kiwei ki kam, mynta ruh kan long kumjuh ha kaba la pynkhyllem ïa ki dieng tangba ka kam pat kam poi shano shano.
Ka sorkar jylla bad ka NHIDCL, kaba dei ka shnat jong ka National Highways Authority of India (NHAI), ki la pynpaw ba kin shna beit ïa ka ‘Flyover’ na Rilbong sha Jhalupara namar ka dei tang kane kaba lah ban pynduna ïa ka dheng kali ha kane ka thaiñ bad kan kham pynsuk ïa ki kali ba kin mih na Shillong,
Ka jingshna ïa ka ‘Flyover’ na Rilbong sha Jhalupara ka dei shi bynta na ka projek kaba don haduh san bynta jong ka surok na Shillong sha Dawki. Ka NHIDCL ka la pyntip ba ka kam ka dang ïaid ha ki lai bynta, hynrei u kontraktor uba la shimti ïa ka kam ha ka bynta banyngkong, ba kynthup ïa ka jingshna ïa ka ‘Flyover’, u la iehnoh ïa ka kam namar ka jingkiew palat ka dor. Kaba kum kane ka long ruh ha ka bynta kaba san jong ka projek ha kaba u kontraktor u la iehnoh ïa ka kam.
Hynrei ka NHIDCL ka la pynpaw ba ka jingslem na ka liang ka sorkar jylla ban aiti ïa ka jaka bad ka jingtuklar ba man la ka por jong ki NGO kiba don jingthmu sniew ka pyntieng ïa ki kontraktor haduh ba ki la phet noh bad wat ki kontraktor ki bathymmai kim kwah ban ïashim bynta ha kitei ki ar bynta jong ka projek ba dang sah.
Na ka liang ka High Court ka la ai jingmut ïa ka sorkar jylla ba kan phah ïa ki briew jong ka ban ïakren bad ka NHIDCL halor ki bynta kiba sah jong ka projek kynthup ïa ka jingshna ïa ka ‘Flyover’. Ka sorkar ka dei ban ai ïa ka jingïatreilang kaba pura bad ka NHIDCL namar ha kaba khatduh, ki ban ïoh jingmyntoi ki dei ka jylla bad ki nongshong shnong.
Shuh shuh ka High Court ka la ong ba ka sorkar jylla bad ka NHIDCL ki dei ban ïa pyrkhat lang bad wanrah ïa ka saiñdur kumno ban pynduna ïa ka dheng kali ha ka por ba shna ïa ka ‘Flyover’ bad kiwei ki bynta jong ka surok Shillong-Dawki.
Ka NHIDCL ka la pyni sha ka Court ïa ka shithi ba ka la thoh sha u Deputy Commissioner ka East Khasi Hills ha ka 25 tarik Lber, 2023, ha kaba la pynpaw ba ka jingsahkut jong ka kam ha kiba bun ki bynta ka long namar bym pat ïoh ïa ka jingbit na ka sorkar. Na ka liang ka High Court ka la pynpaw ba ka sorkar jylla ka dei ban tuklar ïoh don ki bym kwah ba ka projek kan ïaid shakhmat khnang ba ka kam kan ïaid beit noh khlem da don shuh ki jingpynthud.
Nalorkata, ka ïingbishar ka la kyntu ïa ki muktiar ba kin kham ïasyllok bad ka NHIDCL bad kumjuh ruh bad ka sorkar ban khanglad ïa ki NGO kiba pynthut ïa ka kam bad ha kajuh ka por, ban pyntikna ba ka jingtei ïa ka surok kan long kaba ïaid beit kham kloi.
Ha kajuh ka por, ka ïingbishar ka la ai jingmut ïa ki muktiar ba kin long kum ki ksiang ban pynbeit ïa ki jingeh ha kaba ïadei bad ka jingbym pat ïoh jaka jong ka NHIDCL ban pyndep ïa ka surok.
Ka NHIDCL ka la kdew ba ha ka hukum ba la pynmih ha ka 16 tarik Nohprah, 2022, ka ïingbishar ka la kyntu ïa ka sorkar jylla ba kan thung da ka ‘High-Level Committee’ ban weng ïa ki jingeh ha kaba ïadei bad ka jingïoh ïa ka khyndew ban pynheh surok. Ka ïingbishar ka la ong ba lada ka sorkar kam pat thung ïa kane ka ‘Committee’, ka dei ban leh noh mardor khnang ban ïoh ban kham ïoh pynleit jingmut halor ki mat kiba ïadei bad ki kontraktor bad ka NHIDCL.
Na ka liang ka Court ka la ai hukum ïa ka sorkar jylla bad ka NHIDCL ba kin ai ïa ki kaiphod jong ki, bad ka jingbishar kan long biang ha ka 10 tarik Jymmang, 2023.
