Thiruvananthapuram, Lber:
U Jinson Johnson uba long u nong-ialehkai iakob mareh ba pawnam napdeng ki shynrang uba dang iai bat ruh kum u lahduh Asian Games, u lah khur mynta ruh ia ka nam kum u lahduh na ka iakob mareh 1500m ha ka sien iakhun kaba nyngkong jong mynta u snem ha ka lympung ialehkai ba mynta ka Indian Grand Prix II 2023 Athletics Meet ha Thiruvananthapuram, Kerala.
U Jinson Johnson u long ruh u rang-ialehkai uba lah shah jied na ka bynta ka jingia aireng ha ka Asian Games ka ban sa long ha Hangzhou, China ha ki kkhyndiat bnai ban wan. Kumta ha ka 3:44.52 min, u Jinson Johnson u lah rah ia ka thong jingjop na kata ka jingiakob mareh 1500m ki shynrang.
Kumta ruh na ka liang jong ka Athletics Federation of India (AFI) ka lah pynmih ia ka 3:47:84 min kum ka por ialehkai kaba biang tam eh na ka bynta ki nongialehkai ban shah jied bad ioh rung sha katei ka lympung iakhun ka ban sa long ha Hangzhou. Ha katei ka jingiakob hapdeng ki shynrang ha ryngkat bad ka por 3:47.00 min, u Rahul u lah wan ha ka kyrdan ba-ar hadien u Jinson Johnson bad shah jied ruh na ka bynta ban shimbynta ha katei ka lympung ialehkai Asian Games ban sa sdang naduh u bnai Nailur haduh Risaw. Shuh shuh ruh ha ka 3:48.57 min, u Prakash Balu Gadade u lah wan ha ka kyrdan balai ha ryngkat bad ka jingioh ban rah ia ka takma Rnong.
Na ka jingialehkai jong ki kynthei, ka Archana Suseendran ka lah paw kum ka nongjop ha ka jingiakob mareh 100 bad 200m. kumta katei ka nongialehkai ka la lah ban tam noh shakhmat ia ka Hima Das (11.74) bad ia ka AT Daneshwari (11.80) ha ka jingiakob mareh 100m da kaba pyndep ha ka por 11.52 bad kaba lah shah jied ruh sha ka Asian Games na ka jingiakob mareh 200m ki kynthei ha ryngkat bad ka jingpyndep ha ka por 23.21; naba ka por ba lah buh hakhmat ki nongialehkai na ka bynta ban shah jied sha ka Asian Games ka long da 23.43.
Na ka jingialehkai Shot-Putt, u Tajinderpal Singh Toor u lah rah ia ka nam jingjop da ka jinglah ban kawang ha ka jingjngai kaba 19.95m ha ka Indian Open Throws Tournament na ka bynta ban sdang ia ka aiom ialehkai ka jong u da ka jingseisoh bad ruh ha kaba u la lah ruh ban tam lypa shakhmat ia ka jingjngai ba lah buh da ka AFI na ka bynta ban shah jied sha ka Asian Games.
Kumta u Toor u lah khur ia ka takma Ksiar na katei ka lympung iakhun ba mynta da 19.76m ha ka sien pyrshang kaba ar. Nadien jong u lah bud pat sa u Karanveer Singh (19.17m) uba lah wan ha ka kyrdan ba-ar bad u Sahib Singh (19.07m) ha ka kyrdan balai.
Katkum ka khubor ba lah pyllait da ka Atheltics Federation of India (AFI) ka iathuh ba ka Indian Grand Prix 3 kan sdang ha ka 2 tarik u bnai ban wan katba ka bynta ba saw (4th Leg) kan sa long ha ka 10 tarik u Iaiong ha kaba baroh ar tylli kitei ki lympung iakhun kin long ha Bengaluru, Karnataka.
