Jowai, Lber 29:
Ki pulit jong ka thanat Jowai ha ka sngi Balang ki la rah noh ïa ki lai ngut ki briew kiba suba donkti ban pynïap ïa u Pynkhreh Surong sha ïingbishar ban kyrpad ban ai por ïa ki na bynta ban tohkit ïa kine ki suba donkti.
Kine lai ngut suba nongpynïap briew ki dei u Jimmy Kyndait na ka shnong Moorap uba la shah kem ha ka 28 tarik Lber bad ar ngut kiwei pat kiba la shah kem ha ka 21 tarik Lber kiba kynthup ïa u para jong u I Love You Talang, u Meban Talang na Moorap bad u Sambun Dkhar na ka shnong Mynsngat.
Ka ïingbishar ruh ka la mynjur bad ai jingbit ïa ki pulit jong ka thanad Jowai ban tohkit sa san sngi lynter.
Kum ban shu pynkynmaw, kine lai ngut suba pynïap briew la kynnoh ba ki la rahbor bad pynïap ïa u Pynkhreh Surong naduh ka 9 tarik u bnai Lber.
Kumta ki bahaïing jong u Pynkhreh Surong ki la mudui da ka ejahar ha Nartiang Police Station ha ka 21 tarik Lber, 2023 ba u Pynkhreh Surong u la jah rngai ryngkat bad ka kali Mahindra Pick Up. Pynban ha ka step jong ka 22 tarik Lber ki bahaïing ki la ïoh jingtip ba u Pynkhreh u la shah pynïap dusmon.
Ki pulit ki la ïoh ïa ka met ïap jong u Pynkhreh Surong da ka jingïalam jong u para jong u I Love You, u Meban Talang na ka shnong Pommura kaba don kham pajih na ka surok bah ha ka jaka khlaw kaba hap ha Mawryngkneng Police Station.
Hadien kane ka jingïoh kem ïa u Meban Talang bad u Sambun, ki pulit ki la ïoh kem sa ïa u Jimmy bad ki la ïoh biang ïa ka kali Mahindra Pick Up u Pynkhreh Surong na ka shnong Tyrsad, East Khasi Hills District.
Ka khubor ka ïathuh ba kane ka jingpynïap ïa u Pynkhreh Surong ka dei kaba la ïasylla da kiba bun ngut ne ka kynhun ki runar.
