Lausanne, Lber:
Na ka liang jong ki nongpyn-iaid bahakhliehduh jong ka jing-ialehkai Olympic ki lah pynpaw ba ka jingwanphai biang sha ki lympung ia aireng da ki nong-ialehkai jong ka ri Russia bad Belarus kum ki kyrtong-shimet ki bym shym la don sha kano kano ka liang (Individual Neutrals), hynrei lah kyntait pat ban ai ia ka por kaba biang ha ka jingshimbynta ka jong ki na ka bynta ka lympung ialehkai Olympic ka ban sa long ha u snem ban wan ha Paris.
Shuh shuh ruh na ka liang jong u nongpyniaid bahalor ka IOC u Thomas Bach u iathuh ba ka kynhun treikam bahakhmat jong ka synjuk hapoh ka jingialam ka jong u ka Executive Board ka lah pashat jingmut sha ka synjuk pyniaid jingialehkai Olympic jong ki ri bapher bapher bad sha ki nongpyniaid jong ki lympung ialehkai bapher bapher Shabar-ri ba ki nongialehkai kiba don ia ka jingpynithuh(Passport) ka jong ki kum ki nong Russia ne Belarus, ki dei ban shimbynta ha ki lympung ialehkai bad kumjuh ruh ha katei ka lympung ialehkai Olympic ka ban wan tang kum kita ki kyrtong shimet ki bym shym la don sha kano kano ka liang ka ri jong ki.
Na ka liang jong ka Myntri ka tnad ialehkai ka ri Germany ka Nancy Faeser ka lah pynpaw ba ka kam ialehkai jong ki lympung ialehkai Shabar-ri dei ban pynrem jur ia ka jingthombor pyrshah jong ka ri Russia pyrshah ia ka Ukraine khlem kino kino ki kyndon ki bym thikna. Ia kata lah ban leh tang da kaba weng noh shi syndon ia ki nongialehkai jong ki tei ki ar ri ba kin shimbynta ha kino kino ki lympung ialehkai. Napdeng kiwei pat ki jingai jingmut ka IOC ha kaba u Bach u lah pynpaw lah mynjurlang da kawei ka sur ha kaba ka IOC ka iathuh ba ki kynhun ialehkai jong ki nongialehkai kiba don ia ka jingpynithuh ka jong ki kum ki nong-ialehkai ka ri Russia ne Belarus yn ym lah ban pdiang satia ia ki bad ki ban duh shimbynta ha ki lympung kin long ruh ki nongialehkai kiba ai ka jingkyrshan jong ki halor ka thma bad kumjuh ruh ki nongialehkai kiba dang don ka jingiateh bad ka kynhun shipai jong ka ri Russia ne Belarus.
Ka khubor ka iathuh ruh ba ka ri Russia bad Belarus kin ym lah ban pynlong kino kino ki lympung ialehkai bar-ri hapoh u pud-u-sam jong ki. Da kaba bynrap ruh shuh shuh ba yn ym don lama, jingrwai ieid-ri, ki rong-ki-rup ne kino kino ki jingpynithuh jong kitei ki ar ri ba kin pynpaw ne rah ha kino kini ki lympung ialehkai ne ha kino kino ki jing-ialang kiba heh kynthup ruh ha ka madan ialehkai baroh kawei bad kan ym don ruh kano kano ka jingshah khot sngewbha jong ki kynrem ki lyndan ne ki heh ki hain jong kitei ki ar ri ne ki nongmihkhmat jong ki jylla bapher bapher ba kin ioh jingbit ne shimbynta ha kino kino ki lympung ialehkai Shabar-ri ne ha kino kino ki jingialang kiba heh.
Shuh shuh na ka liang jong u Bach ha ka jingai jingkren hadien ka jingialang jong ka EC ha Lausanne, u iathuh ba ka rai ha kaba iadei bad ki nongialehkai jong kitei ki ar ri ban shimbynta ha ka lympung ialehkai Olympic 2024 ha Paris bad ha ka 2026 Winter Olympics, khlem pep yn sa shim ia kata ka rai ha ka por kaba dei bad kaba biang eh ban pynbna paidbah.
U lah pynpaw ruh ba ka jingshimbynta jong ki nongialehkai jong kitei ki ri ha ryngkat ka jingpynithuh (Passport) ka jong ki ba ki dei na ka ri Russia ne Belarus ha ka Olympic 2024 ym shym la pdiang satia la ka long ha ka jingiamir jingmut ne ha katei ka jing-ialang kaba long mynta.
Palat 300 ngut ki nongialehkai Fencing kiba mynta bad kiba rim dang shen ki lah pyrta sha u Bach; uba lah rah ia ka nam kum u lahduh bad ka takma Ksiar na ka jingialehkai Fencing ha ka Olympic 1976, ba un nang iai pynneh-pynsah shuwa ia ka jingkhang ialehkai ia ki nongialehkai jong kitei ki ar ri. Hynrei dang shen, na ka liang jong ka FIE kaba long ka synjuk bahakhliehduh jong ka jing-ialehkai Fencing ha ka pyrthei ka lah shah bad ailad ia ki nong-ialehkai Fencing jong kitei ki ar ri na ka bynta ka jingwanphai biang ka jong ki sha ki lympung ialehkai bar-ri bad kaba lah kylla long ruh ka jait jingialehkai Olympic kaba nyngkongeh napdeng kiwei pat ban plie biang sa shisien ia ka jynkhang na ka bynta ki nongialehkai jong kitei ki ar ri.
