Shillong, Lber 29:
U nongïalam ka Meghalaya Pradesh Congress Committee (MPCC), Bah Ronnie V. Lyngdoh ha ka Sngi Balang u la ong ba ka jingbym leh bha jong ka seng ha kane ka ilekshon ba la dep ka dei namar ka jingmih noh jong ki MLA napoh ka seng.
“Nga tharai phi sngewthuh tang hashuwa jong ka ilekshon, bun ki MLA ki la mih na ka seng. Ngi don tang khyndiat por ban pynkhreh, ban pynithuh ïa ki kyrtong ba don jingkyrmen ban jop,” la ong u Bah Lyngdoh.
U la ong ba ka ‘vote’ ka la pharia bha ha kane ka ilekshon ba dang shu dep.
Utei u nongïalam u la ong ruh ba lada khmih bha ha Ri-lum Khasi-Jaiñtia, ka National People’s Party (NPP) ka la shah kyntait namar ka la jop tang ha 8 tylli ki konstitwensi na ki 36 tylli.
“Lada phi kylli na ngi, phi lah ruh ban kylli ïa ka NPP namarba ki la shah kyntait ha ki paidbah ka Ri-lum Khasi-Jaiñtia,” u la ong.
Ha kawei ka liang utei u nongmihkhmat ka Mylliem u la ong ruh ba katto-katne na ki kyrtong jong ka seng kim shym la rem kput hynrei ki la rem tang khyndiat.
Kum ban shu kdew hangne, ym shym la don iwei ruh na ki nongmihkhmat ka Congress kiba la jop ha u snem 2018 ki ban ïakhun na ka seng ha kane ka ilekshon ba la dep sha ka ïingdorbar thawaiñ.
Ha u snem 2021, ka seng ka la pra phom bad na ki 17 ngut ki MLA, 12 ngut na ki hapoh ka jingïalam u Myntri Rangbah barim ka Jylla, Dr. Mukul Sangma ki la pynïasoh noh sha ka All India Trinamool Congress.
Hadien kane, wat ki 5 ngut kiba dang sah ruh ki la mih noh bad leit pynïasoh sha kiwei pat ki seng saiñ pyrthei.
Ha kane ka ilekshon ba la dep, ka seng ka la jop tang 5 tylli ki konstitwensi. Kine ki kynthup ïa 4 ngut na Ri-lum Khasi-Jaiñtia bad iwei na Ri-lum Garo.
