Shillong, Lber 29:
Ka Meghalaya High Court ha ka Sngi Balang ka la hukum ïa uwei na ki nongshah mudui ba un ai ïa ki kot ki sla bad kiwei ki jingdonkam halor u dewïong uba don 52,000 MT ïa uba la thmu ban khaïi sha Bangladesh ha u Ïaïong 2022.
Une u nongshah mudui u la kam ba u don ki ‘Challan’, ‘Invoice’ bad ki ‘e-way bill’ halor utei u 52,000 MT u dewïong.
Ka ïingbishar ka la ong ba utei u nongshah mudui un hap ban ai da ka ‘affidavit’ bad ki kot ki sla ban pyni ïa ki ‘Invoice’, ‘Challan’ bad ki ‘e-way bill’ halor utei u marpoh khyndew.
Nalorkata, ka High Court ka la ong ba katkum ka hukum ba la pynmih ha ka 22 tarik Lber, 2023, ka paw ba utei u nongshah mudui u la don ruh bad u ïa u dewïong uba haduh 1,25,000 MT. Lada long kaba lah, ha kajuh ka ‘affidavit’, utei u nongshah mudui un hap ban pyni ïa ki kot ki sla halor une u dewïong ba 1,25,000 MT.
Na ka liang ka High Court ka la ong ba kan ym pdiang satia lada don ka jingpynslem ban ai ïa ki jingthoh bad ki kot ki sla ka. Ka la buh ruh ïa ka tarik ba khatduh halor kane, bad kata ka long 4 tarik Ïaïong, 2023, bad ka jingbishar kan long biang ha ka 6 tarik Ïaïong, 2023.
Ka la ong ruh ba wat lada ki kot ki sla halor utei u dewïong ba 1,25,000 MT kim pat biang, hynrei u nongshah mudui un hap ban pynbiang pat ïa ki kot ki sla bad kiwei ki jingdonkam ha kaba ïadei bad u dewïong uba 52,000 MT katkum katei ka por ba la buh.
