Imphal, Lber:
Ki bor pulit jong ka jylla Manipur ha ka 28 tarik mynta u bnai ki la pyntip ba ki la ïoh ban kem ïa 2 ngut ki dkhot jong ka seng kieng atiar kaba na ka ri Myanmar, ka People Defence Force (PDF). La ïoh ban kem ïa kitei ki 2 ngut ki ehrang na ka thaiñ Tengnoupal district jong ka jylla Manipur.
Kat kum ki jingïoh lum khubor la ïathuh ba ïa kitei ki 2 ngut ki ehrang la ïoh ban kem hadien ba k bor pahara ka tnat pulit jong ka jylla ki la leit ban pynlong ïa ki jingkhynra ha ka thaiñ khappud kaba hadpeng ka ri India bad ka ri Myanmar – Marjan bad ka thaiñ Jangnoi. Na kitei ki 2 ngut ki ehrang, ki bor pulit ki la ïoh ruh ban kurup ïa katto katne tylli ki tiar siat kynthup ïa ki kuli bad kumjuh ruh ka pisa jong ka ri Myanmar.
Ki 2 ngut ki dkhot seng kieng atiar kiba la shah kem ha katei ka sngi ki kytnhup ïa u Neipaing (38 snem ka rta) – nongshong shnong ka thaiñ Tamu Thauyuwate, bad u Yeyint Aung (35 snem ka rta) – nongshong shnong ka thaiñ Uphapha – kiba dei baroh 2 tylli ki shnong kiba na ka ri Myanmar.
Halor katei ka jingjia la ïathuh ba na ka liang ki bor pulit jong ka jylla ki la leit ban pynrung da ka mokotduma bad aiti noh ïa kitei ki 2 ngut bad ïa ki tiar siat ba la ïoh kurup sha ki bor pulit ka thaiñ Tengnoupal na ka bynta ban pynlong ïa ki jingtohkit kiba dang sah.
