Shillong, Lber 29:
Ka nongïalam ka All India Congress Committee (AICC), ka Bobbeeta Sharma ha ka Sngi Balang ka la ong ba ka jingkren u Myntri Rangbah ka Jylla, u Conrad K. Sangma halor u Rahul Gandhi ka kdew shai ba u ïadon bynta lang bad ka Bharatiya Janata Party (BJP).
U Sangma, ha ka Sngi Saitjaiñ jong ka taïew ba la dep u la ong ba ka jingbym pdiang satia jong u nongïalam ka Congress, u Rahul Gandhi ïa ka rai jong ka ïingbishar bad ki kyndon ka ECI ka long kaei-kaei kaba sngewsih.
“Ka long kaba shai ba u (Sangma) ïadon bynta lang bad ka BJP. Naduh kaba sdang ha ka por ba ngi don shane ha ka ilekshon, ngi la ong ba ki ïadonlang. Kane ka long tang kum ka sawangka (drama) hakhmat ki paidbah ba kim don lang bad ka BJP ne ba ka BJP kam don lang bad ka NPP,” la ong ka Sharma haba kren sha ki lad pathai khubor.
Haba kdew ba ka NPP bad ka BJP ki ïadonlang beit barabor, ka la ong, “Ngi tip ïa kane bad mynta ki la ngat ha ka shrip lajong da kaba ong ba ka Sorkar NPP ka dei ka Sorkar kaba bamsap tam hapoh ka ri. Ai ba ka BJP kan jubab, u Media Chairman ka seng, u Jairam Ramesh u la dep thoh ïa kane sha ka CBI.”
Kum ban shu kdew hangne, u Ramesh u la thoh sha ka CBI ba kan tohkit ïa u Myntri ka tnad kam pohïing ka Sorkar Pdeng, u Amit Shah halor ka jingong jong u ba ka Sorkar (ba la dep) ha Meghalaya ka dei kaba bamsap tam hapoh ka ri.
“Haba don mano-mano ba bamsap, phi ju buh beit ïa ka ED, CID, CBI, bad kiwei-kiwei ban kthong ïa ki…balei ym ïa kane ka Sorkar NPP, balei ym ïa une u CM. Ai ba kin shim ka rai, ngi la dep phah ka jingthoh sha ka CBI,” ka la ong.
Kum ka dak ka jingpyrshah halor ka jingshah mait kyrteng u Gandhi na ka jinglong dkhot ka Lok Sabha, ka Sharma ka la ong ba ka AICC kan sa pynlong ïa ka ‘Jai Bharat Satyagraha’ naduh ka 29 tarik u Lber haduh ka 8 tarik u Ïaïong mynta u snem.
Ha kajuh ka por, yn pynlong ruh ïa ki prokram ha ki distrik, blok bad Mandal.
Nalor kine, ha ka 3 tarik u Ïaïong, ka seng lyngba ka NSUI kan sa pynlong ïa ka ‘Post Card Campaign’, katba ha ka 15 haduh ka 20 tarik yn pynlong ïa ka ‘Jai Bharat Satyagraha’ ha ki distrik. Naduh ka 20 tarik haduh ka 30 tarik u Ïaïong yn pynlong ïa ka ‘Jai Bharat Satyagraha’ ha ki kyrdan jong ki Jylla bad ka ‘All India Jai Bharat Yatra’.
