London, Lber:
Katkum ka thup kyrdan ba thymmai ia kaba lah pyllait paidbah mynta da ka International Cricket Council (ICC) ha kaba iadei bad ki thup bapher bapher, ka khubor ka iathuh ba na ka thup jong ki nongtied, u kapten jong ka kynhun ialehkai Kriket ka ri u Rohit Sharma u lah kiew mynta da shi jaka na ka bynta ban ioh shong ha ka kyrdan ba 8. Katba u rangialehkai ka ri uba tbit ialehkai ha baroh ki liang ialehkai u Hardik Pandya u lah kiew da 10 jaka na ka bynta ban ioh shong ha ka kyrdan ba 76 ha ka thup ki nongkawang bol.
Ka khubor ka iathuh ruh ba u Shubman Gill u iaisah mynta ha ka kyrdan kaba biang tam eh ha katei ka thup ki nongtied kata ha ka kyrdan ba 5 katba u Virat Kohli u ioh ban shong ha ka kyrdan ba 7 hadien ka jingpynthymmai ia ka thup kyrdan ka lah pynlong ia u tei u kapten barim ka India ban ioh jingmyntoi na ka rukom ialehkai bha ka jong u ha ka jingakhun ODIs ha Chennai.
Ia ka thup kyrdan jong ki nongtied lah iai lamkhmat biang sa shisien da u kapten ka Pakistan u Babar Azam katba u Mohammed Siraj ha ka kyrdan ba 3 uba long ruh tang ma u marwei napdeng ki nongialehkai ka India ban ioh rung ha ka thup ba 10 jong ka thup ki nongkawang bol ia kaba lah bat ia ka kyrdan ba nyngkong da u nongkawang bol ka Australia u Josh Hazlewood.
Napdeng kiwei pat ki nongalehkai, u nongkawang bol ka Afghanistan u Rashid Khan u lah wanphai biang mynta sha ka kyrdan ba hajrong jong ka thup kyrdan ki nongialehkai T20 hadien ka jinglah ban ialam ka jong u ia ka kynhun baorh kawei sha ka 2-1 jingjop pyrshah ia ka Pakistan ha Sharjah.
U Rashid mynta u la lah ha ka ban tam noh shakhmat ia u rangialehkai ka Sri Lanka u Wanindu Hasaranga sha ka thup kyrdan ba nyngkong napdeng ki nongkawang bol ha ka thup. Nalor u Rashid lah bud ruh mynta sa u Mujeeb Ur Rehman ban kiew kyrdan mynta ha ka thup kata na ka kyrdan ba 10 sha ka kyrdan ba 8 katba u Fazalhaq Farooqi uba lah khur ia ki san wiket ha katei ka jingiakhun, u lah kiew mynta da khat-ar jaka sha ka kyrdan ba 3.
Ha ka thup kyrdan jong ka lympung ialehkai ODIs, u nongkawang bol spin ka Australia u Adam Zampa u lah kiew da lai jaka sha ka kyrdan ba 6 hadien ka jingkhur jingjop jong u ha ka jingiakhun kaba lai pyrshah ia ka India.
Shuh shuh ruh u Mitchell Marsh uba lah khur ia ka nam ‘Player of the Series’ na ka tei ka jingiakhun, u lah shah kyntiew kyrdan mynta da kaba kiew da haduh saw jaka sha ka kyrdan ba 51 napdeng ki nongkawang bol.
