Shillong, Lber 29:
Ki paidbah ka Sohïong konstitwensi kaba hap ha East Khasi Hills District ki pynpaw ïa ka jingsngewkmen namar kin ïoh noh ban jied ïa u nongmihkhmat u ban peit ïa ka khia ka shon jong ka konstitwensi. Kane ka wan hadien ba ka Election Commission ka ri India ka la pynbna ban thep vote ha ka 10 tarik Jymmang, 2023 bad ka jingñiew vote kan long ha ka 13 tarik jong ujuh u bnai ha katei ka konstitwensi.
Ka jingpynsangeh ïa ka jingthep vote ha katei ka konstitwensiha ka 27 tarik Rymphang, 2023 ka dei hadien ka jingkhlad noh u kyrtong ka UDP u Bah HDR Lyngdoh ha ka 20 tarik Rymphang, 2023.
Haba U Nongsaiñ Hima u la hiar sha Sohïong mynta ka sngi ka 29 tarik Lber, 2023 ban twad jingmut na ki ‘riew paidbah. Katto katne napdeng ki nongshong shnong kiba shong dukan ki la pynpaw ka jingsngewkmen naba kin ïoh ban jied noh ïa u nongmihkhmat na ka bynta ba un peit ïa ka jingeh jong ki paidbah ka konstitwensi.
Ha kane ka jingïakynduh ki la pynpaw ba ha kine ki sngi ba la pynsangeh noh ban thep vote ha katei konstitwensi namar ka jingkhlad noh u Bah HDR Lyngdoh, ki la don shisha ka jingsngew kynjah namar kim ïoh ban thep vote lang kumba long lem kiwei ki konstitwensi hapoh ka jylla.
Nangta ki don ruh ka jingkyrmen ba u nongmihkhmat u ban shah jied ha kane ka ilekshon un hap ban wanrah ïa ki kam pynroi hapoh ka konstitwensi namar ki dang bun ki jingduna.
Shuh shuh ki la pynpaw ba ha kane ka ilekshok kaba ki la dep pynkhreh ka long shisha kaba shongshit namar man ki seng saiñ pyrthei ki la pyni ïa la ka jong ka jingbun paid. Tangba ki don jingkyrmen ba ha kane ka ilekshon kan long kaba jai-jai khnang ban wanrah ïa ka shong suk shong saiñ hapoh ka shnong.
Ki kyrtong ki ban ïakhun ïa kane ka ilekshon ha Sohïong ki long u Bah Samlin Malngiang na NPP, u Bah Synshar Lyngdoh na UDP, u Bah Osborne Kharjana na Congress, u Bah Stoding Thabah na TMC, u Bah Sandondor Ryntathiang na HSPDP bad u Bah Serap Eric Kharbuki na BJP.
