Mawkyrwat, Lber 29:
U MLA ka Mawkyrwat Konstitwensi, u Bah Renikton L Tongkhar ha ka sngi Balang ka 29 tarik Lber, 2023, u la leit jurip ïa ka Civil Hospital ba 100 jingthiah ha Mawkyrwat, South West Khasi Hills District kaba la dep ban plie mynta la kumba 3 bnai eiei.
Ha kane ka jingleit jurip, la synranlang ïa u Bah Renikton da u Medical Superintendent, u Dr. W Sutnga bad ka Nursing Superintendent, ka Kong L Kharbhih lem bad kiwei kiwei ki riew rangbah.
U Bah Renikton haba ai jingkren hadien ka jingjurip ïa kane ka jaka sumar u la pynpaw ïa ka jingkmen ba kum u nongmihkhmat ka dong ka thaiñ u la ïoh ban wan jngoh biang ïa kane ka jaka sumar.
U la pynpaw ruh ïa ka jingsngewkmen ban ïohi ïa ki doktor bad ki nos kiba la shimkhia ban pynïaid ïa kane ka jaka sumar kaba dang bun ki jingduna ha kaba ki la pyrshang ban pynbiang katba lah da kaba thaw ïa ki lad ki lynti nalade hi.
U Bah Renikton u la kular ruh ba un sa shimkhia ïa ka jingpynsngew ki doktor ïa ki jingdonkam ban pynbiang ha kane ka jaka sumar naduh ka OPD, ka OT, ka jaka pyllang um, ka jaka pynïeng kali, ki nongtrei naduh ki staff, ki doktor, ki nos, ki peon, ki driver bad kiwei kiwei.
“Ngi sngwthuh ba ka jingdonkam ka pisa ka long kaba bun kaba kot sha ki klur bad kum u nongmihkmat ngan pyrshang ban buddien ban pynïoh ïa ki jingdonkam baroh ha kane ka jaka sumar, da kaba bynrap baroh ki jingdonkam kiba don ha Civil Hospital Shillong ki dei ban don hangne ha Mawkyrwat khnang ba kan nym don shuh ka jingphah ïa ki nongpang na Mawkyrwat sha Shillong,” la ong u Bah Renikton.
