Bengaluru, Lber:
U Myntri Rangbah barim jong ka Karnataka u HD Kumaraswamy ha ka sngi Ba-ar u la pynbna ba lada ka seng Janata Dal-Secular (JD-S) ka wan ha ka bor synshar ha ka jylla, kan sa pynbiang da kumba 50 percent ka jingkyrshan pisa na ka bynta ki Cooking Gas Cylinder.
U nongïalam jong ka seng JDS u la ïakren bad ki nongthoh khubor ha ka por ba la don ka jingïabam jingbam sngi ha ka por ba la don ka Pancharatna Rath Yatra ha Yeshwantpur konstitwensi. “Ka sorkar kmie ka la pyntreikam ïa ka Ujwala Scheme da kaba kular ban pynbiang ei ïa ka Gas. Ki longkmie kiba ngeit ïa kane, ki la ïoh ïa ka Cylinder bad ki la kyndit haba ki la ïohi ïa ka dor kaba heh kaba la tam ïa ka T. 1,000 bad ka bym shym long kaba suk na ka bynta ki briew ki baduk ban siew ïa ka,” la ong u Kumaraswamy.
U la ong ba ym tang kane ka skhim halor ka jingpynduna dor ha ka Gas shet jingshet ba ka seng jong u ka don; ki la don shuh shuh shibun kiwei pat ki skhim. “Ki la don baroh kumba san tylli ki Cylinder shi snem ïa kiba la buh na ka bynta ban sam eh. Ki nongñiah auto kin sa ïoh mar T. 2,000 shi bnai. Kumjuh ruh ngin sa trei na ka bynta ban pynurlong ïa ka jingdawa ka ban neh na ka bynta ki nongtrei Anganwadi,” la ong u Kumaraswamy.
