Shillong, Lber 29:
U Lamphang ka Ïingdorbar Thawaiñ u Thomas A Sangma u la lum ïa ka jingïalang jong ka High Powered Committee (HPC) halor ka jingtei ïa ka Ïingdorbar kaba thymmai ha Mawdiangdiang ha kaba u Myntri Rangbah u Conrad K Sangma ruh u la leit peit ïa ka jaka kaba la sahteng ka jingpyntrei hadien ba la jia ka jingkhyllem ka tnum pyllun (dome) ha u snem ba la dep.
U Lamphang u la pynïaid ïa ka jingïalang jong ka HPC ha kaba la donlang ki dkhot jong ka kiba kynthup ïa ki MLA bad ki ophisar ka Sorkar Jylla.
Kiba la donlang ha kane jingïalang ki long u Myntri Rangbah, ki arngut ki Symbud Myntri Rangbah kiba kynthup ïa u Bah Prestone Tynsong bad u Bah Sniawbhalang Dhar, nalor u Symbud Lamphang u Timothy D Shira, ki MLA ba kynthup ïa u Rupert G Momin, Bah Charles Pyngrope, Bah Lahkmen Rymbui, Bah Banteidor Lyngdoh bad ki heh ophisar ka Sorkar Jylla kynthup ki ophisar na ka tnat PWD (Buildings).
Na ka liang ki dkhot ka HPC kynthup ïa u Myntri Rangbah u Conrad K Sangma ki la leit peit ruh ïa ka jingtei ha Mawdiangdiang lem bad ki ophisar.
Hadien katei na ka liang u Myntri Rangbah u la ïathuh ba ki nongtrei ki la nang pynkhuid ïa ka bynta jong ka jingtei kaba la dap da ki maw kiba la lang shi jaka namar ka jingkhyllem ka tnum pyllun khnang ba ka jingpyntrei ïa ka Ïingdorbar kan sdang biang.
Kum ban shu pynkynmaw, katei ka tnum pyllun ka la khyllem ha ka 22 tarik Jymmang, 2022.
Ha ka 13 tarik mynta u Lber, na ka liang u Lamphang, u Thomas A Sangma ruh u la leit peit ïa ka jaka ba tei ïa ka Ïingdorbar ha Mawdiangdiang ha kaba u la bthah ïa ki nongshim kam ban nang pynkhuid noh ïa ki jaboh bad ki maw lyngkhot kiba sahkut hapoh la kumno-kumno ha shwa ka 15 tarik Ïaïong.
Ïa ka rukom pynwandur thymmai ïa ka tnum pyllun dang ap ban ïoh na ka Indian Institute of Technology (IIT) Roorkee bad IIT Guwahati.
Namar kata, ynda la ïoh ka jingmynjur na kine ki IIT, ym sa pynïaid shakhmat ïa ka jingtei thymmai ïa ka tnum pyllun.
