Shillong, Lber 29:
Ka jingai jingithuh ïa u nongïalam ka Liang Pyrshah jong ka Ïingdorbar Thawaiñ kaba khatwei ka Jylla kan shimpor shuh shuh namar kane ka kam ka dang kyllaiñ haduh mynta ha kaba u Lamphang un hap ban lum jingtip sa na ki Ïingdorbar Thawaiñ kiba na kiwei ki Jylla kynthup ruh na ka Ïingdorbar Lok Sabha bad Rajya Sabha namar bym don kawei ruh ka seng Liang Pyrshah kaba biang ha ka jingdon ki MLA ban ïoh ïa kane ka kyrdan.
U Lamphang ka Ïingdorbar Thawaiñ u Thomas A Sangma u la ong ba kane ka kam ka dang sahteng namar u hap wad la ka jia ne em ha kiwei ki Ïingdorbar Thawaiñ jong kiwei pat ki Jylla.
U Thomas u la ong ba un hap lum jingtip ruh na ki ar tylli ki Ïingdorbar Thawaiñ Lok Sabha bad Rajya Sabha halor ka jingithuh ïa u nongïalam ka Liang Pyrshah.
U Lamphang uba dang twad jingmut na ki ’riew tip aiñ, u la ong ba kane ka kam ka dei kaba kham jyrwit-jyrwat namar ym don kano ka seng saiñ pyrthei kaba lah ban kam ïa ka kyrdan nongïalam ka Liang Pyrshah namar kam biang ha ka jingdon ki MLA.
Katkum ka kyndon, ka seng kaba don 10 ngut ki MLA ki lah ban kam ïa ka kyrdan nongïalam ka Liang Pyrshah.
Hynrei ha kane ka Ïingdorbar Thawaiñ kaba mynta, ki lai tylli ki seng kita ka Congress ka don tang 5 ngut ki MLA, ka Trinamool Congress (TMC) ka don tang 5 ngut ki MLA, bad ka Voice of The People Party ka don 4 ngut MLA.
Lada ïaid katkum ka rai kaba la ai da u Lamphang barim, u Bah E.K Mawlong, kano-kano ka seng kaba don 6 ngut ki MLA ka la lah ban kam ïa ka kyrdan nongïalam ka Liang Pyrshah.
“Nga dang wad ki kot ki sla la ki don ne em ki jingjia kumba long ma ngi bad na ka liang ka shlem treikam jong nga ruh ka lum jingtip haba ïadei bad kane,” la ong u Lamphang.
U la ong ba lada dei ba kine ki seng Liang Pyrshah ki wan lang ban thaw ïa ka kynhun ka la suk ïa u ban shim ïa ka rai.
Kum ban pynkynmaw, ha u snem 2013, haba ka United Democratic Party (UDP) ka don tang 8 ngut ki MLA, u Lamphang barim ka ka Ïingdorbar Thawaiñ, u AT Mondal u la pynshong nongrim na ka rai kaba la ai da u Lamphang barim u Bah E.K Mawlong (ba la khlad noh) uba la ithuh ïa ka seng kaba don 6 ngut ki MLA ban ïoh ïa ka kyrdan nongïalam Liang Pyrshah.
Shuh shuh ka UDP bad ka NPP ki la thaw ïa ka kynhun Liang Pyrshah kaba kyrteng ka Meghalaya People’s Forum (MPF) ha kaba la thung ruh ïa u Opposition Chief Whip jong ka Ïingdorbar Thawaiñ.
