Bengaluru, Lber:
Ki shipai ka tnat Border Security Force (BSF) ha ka miet jong ka lah sngi U Blei ki la siat ïa kawei ka Drone kaba la rung sha ki bynta jong ka ri India na Pakistan ha Border Outpost (BoP) kaba don ha Rajatal. Ha katei ka Drone la don ruh ka song jong u drok. Kane ka jingjia ka la jia ha ka por 8.30 mynmiet haba ka kynhun shipai ka la ïohsngew ïa ka jingsawa jong ka jingriew ka Drone ha katei ka thaiñ bad haba ki la ïohsngew ïa kane ki la khmih bniah bad siat ïa katei ka Drone kaba her ha ki bynta khappud.
Kum shi bynta ban ïathuh bniah halor kane ka jingjia, u nongaiktien jong ka tnat BSF u la ong, “Ha ka 27 tarik, Lber, 2023, ha ka por 8.30 mynmiet, ka kynhun jong ki shipai kaba la pynkhklaiñ bha ïa ka jingpahara ha ki bynta jong ka Indo-Pakistan Boundary ka la lap ïa ka Drone kaba la wan na ki bynta jong ka ri Pakistan ha ka thaiñ BOP Rajatal, Sector Amritsar. Kane ka Drone ka la shah siat noh bad la ïakhun pyrshah ïa ka.” “Kumjuh ha ka step jong ka sngi Ba-ar, ha ka por ba la don ka jingleit khmih bniah, ki shipai BSF ki la lap ïa ka Drone bad kawei ka pla na ka jaka kaba jngai kumba 700 m na u IB bad ha ka jingjngai kaba 350 m na ka jingker ha u BS. Haba la plie ïa kane ka pla la lap ba la don ka jingsong ha kaba la don ka jingsop da ka Tape rong stem bad kawei ka Torch kaba rit,” la ïathuh u nongaiktien.
Kumba la ïathuh la ong ba kane ka jingïoh ban kurup ïa u jingdih pynbuaid ka la jia shi sngi hadien ba la ïoh ban kurup ïa ka song jong u Heroin ba 6.2 kilo ha kaba la pynshisha ba la pynhap da ka Drone jong ki nong Pakistan ha kaba la lap ha Amritsar Sector. Kumjuh ha ka sngi Saitjaiñ, la ïoh ban kurup ïa u Heroin ba 7 kilo da ki shipai BSF bad ki pulit jong ka Punjab ha ka jingïatreilang bad ki shipai ïada khappud ha khappud India bad Pakistan ha Tarn Taran distrik.
Ha kawei pat ka jingjia, la ïathuh ba ka kynhun shipai BSF ka la ïoh ban kurup ïa u Heroin ba 2 kilo ha kaba la pynshisha ba la pynhap na ka Drone jong ki nong Pakistan ha ka thaiñ kaba hap hapoh ka jingkhmih jong ka Joint Check Post (JCP) Attari. Ki shipai BSF ki la kem ruh ïa arngut ki briew ba la suba donkti ha ka kam khaïi drok bad ïoh ruh ban kurup kumba 3.22 kilo u Heroin na ka jingleit pahara jong ki ha Border Post (BoP) jong ka thaiñ Ramtirath, kaba hap ruh ha ka Amritsar Sector. Kine kiba la shah kynnoh ki la shahkem ha ka por ba la don ka jingleit pahara hadien ba ki shipai ki la ïoh ban siat ïa ka Drone kaba la wan na Pakistan ha katei ka thaiñ.
