Itanagar, Lber:
Ki bor pulit jong ka jylla Arunachal Pradesh ha ryngkat ka jingïatreilang bad ki bor shipai ka tnat Assam Rifles ha kane ka taiew kaba mynta ki la pyntip ba ki dang ïai bteng ban thwet ïa ki 2 ngut ki dkhot jong ka seng NSCN – Roksen Homcha bad Titpu Kitnya; kiba la lait phet na central jail kaba don ha ka HQ jong ka thaiñ Tirap – Khonsa ha ka Sngi U Blei ba la dep.
Tat haduh ba la ïoh lum ïa kane ka kyrwoh la ïathuh ba ym pat shym la lapdien satia ïa kitei ki 2 ngut ki dkhot ka NSCN naduh ba ki la lait phet.
Ha ka jingpyllait kyrwoh jong u nong-aiktien ka tnat pulit Arunachal Pradesh – Rajbir Singh u la pyntip ba tad haduh kane ka kynti ba mynta ka tnat pulit kam pat shym la ïoh satia ïa kino kino ki khubor kiba thymmai kiba ïadei bad ka jingjia lait phet jong kitei ki 2 ngut ki dkhot ka NSCN. U la pyntip ba ka tnat pulit ka la shim ïa ki sienjam kiba kyrpang khnang ban ïoh kem biang ïa kitei ki 2 ngut kiba la lait phet.
Kat kum ki jingïoh lum khubor la ïathuh ba dei ha ka sngi U Blei ba la dep ha ka por kumba 5 PM katba u pulit IRBn (Wangnyam Bosai) u dang don hadpeng ki kam pahara, kitei ki 2 ngut ki dkhot ka NSCN ki la thombor pyrshah ïa u bad knieh ruh ïa ka suloi AK 47 bad siat ruh ïa u.
U Bosai u ba la shah siat na ki bynta jong ka kpoh u la khlad noh ha katei kajuh ki ka por ba la leit ban rah sumar ïa u sha hospital kaba don ha nongbah Dibrugarh, Assam.
Kat kum ka jingïathuh jong ki bor pulit ki la pyntip ba u Roksen Homcha – nongshojng shnong ka thaiñ Borduria u dei u runar u ba la shah rai pynrem da ka jingshah set patok ba shirta na ka daw jong ka jingdonkti jong u ha kawei ka kam pynïap briew. Ki bor pulit ki la ïathuh ba u dei ruh u nongïalam jong ka seng u ba don ïa ka jingïadei kaba ïajan bha bad u Loliam Latey Lowang – u nongïalam ba hakhmat eh jong ka NSCN-K (Niki-Sumi) ha ka jylla Arunachal Pradesh.
Kat kum ka jingïathuh jong ki bor pulit ka jylla ki la pyntip shuh shuh ba u Loliam Latey Lowang u dei uwei napdeng ki runar u ba la lait phet na ka patok ha ka 7 tarik u Nailar, 2013 ha kaba ki la don ruh haduh 6 ngut kiwei pat ki koidi kiba la lait phet ha ryngkat bad u.
Sa uwei u dkhot ka NSCN u ba la lait phet na patok ha ka sngi U Blei ba la dep u dei u ba la tip kyrteng kum uTitpu Kitniya na ka thaiñ Kharsang, Changlang district. Kitei ki 2 ngut ki dkhot ka NSCN kiba la lait phet ha katei ka sngi ki dei ki runar kiba la shah set phatok la kumba 6 bnai eiei hashwa ba kin lait phet.
Tad haduh ba la ïoh ïa ka khubor la ïathuh ba na ka liang ki bor pulit jong ka jylla kim pat shym la lah satia ban tip ba kumno kitei ki 2 ngut ki la ïoh lad ban knieh ïa ka suloi na u pulit langrut ha katei ka snig.
Kat kum ka jingïathuh na uwei u heh sorkar ka thaiñ Tirap u la pyntip ba watla na ka liang ki bor pulit kim pat shym la tip ïa ka daw ba kumno kitei ki 2 ngut ki la lait phet, pynban la ïoh jingtip ba bun na ki koidi kiba shah set ha katei ka phatok ki don ïa ka jingïadei kaba ïajan bha bad ki nongap pahara jong katei ka patok.
