Nongstoiñ, Lber 29:
Ka Hynñiewtrep Youths’ Council (HYC) West Khasi Hills ka la dawa na ka tnat pulit kumjuh ïa ka Sorkar Jylla ba kan ai ka jingïada ym tang ïa ka Malchapara, hynrei ïa baroh ki 12 tylli ki shnong ïa kiba la pynhap jubor sha Assam namar ba mynta ki don hapdeng ka jingshong syier.
U President ka HYC West Khasi Hills, u samla Lumlang Kharsyiemlieh, u la ong ba ka HYC ka kyntu jur ïa ka Sorkar Jylla ba kan ai jingïada ïa kitei khatar tylli ki shnong jong ka West Khasi Hills kiba la shah pynhap sha Assam, namar lada ka ïai jia kumne lehse kan nang kham pynbitar ïa ki paidbah ka West Khasi Hills. Ha kajuh ka por u la kyntu ïa u nongmihkhmat ka thaiñ, kumjuh ïa ki MLA jong ka West Khasi Hills ba kin kyrshan ïa ka jingïakhih kumjuh ha kylleng kylleng ka bri ka hynñiewtrep halor katei ka bynta.
Shuh shuh na ka liang ka HYC ka la pynpaw ruh ka jingsngewkmen hadien ba ka Hima Nonglang ka la ïohi ïa ka jingjynjar bad jingeh jong ki paidbah nongshong ka Malchapara ha kaba kim lah shah shuh ïa ka jingwan pynsyier jong ki pulit ka Assam, kumta na ka liang ka hima ka la ïalam noh ïa 25 ngut kiba shah thwet ban pynsah ha ophis ka hima.
“Kane lehse ka long kaei kaei kaba bha eh lane ka nuksa ruh ïa kiwei kiba don ha kum kane ka bynta ban pyllait na kata ka jingshong syier,” la ong u samla Lumlang.
Nalor kata, u la ong ruh ba balei ka HYC ka leit sha Malchapara naba baroh shikatta ki don kiba la kyrshan ïa ka MOU kaba la lamkhmat da ka MDA ka sorkar barim ki ong ba ka jingkhih jong ka HYC ka dei tang ka jingshah pynbieit politik hynrei baroh ki ïakwah ban leit sha Assam. Pynban mynta ka paw shai ba ka jingshah pynbor ïa ka Malchapara bad kiwei kiwei kiba don ha katei ka thaiñ kiba hap ha ka Kizang Sector bad ka Tarabari Sector kaba hap ha ka jingïapynbeit pud ha ka wat kaba nyngkong ha kaba ki paidbah ki hap ban ïakhih ïaksar namar ba ki la kordit. Kumta na ka liang jong ka HYC ka kren shai kumba la kren naduh myn nyngkong ka HYC kan don ryngkat bad ka Hima Nonglang la kan leit sha ïingbishar ne ha kano kano ka jingïaleh kan don ryngkat.
U la ong ruh kumba ka Hima Nonglang ka la wanrah ïa kitei ki briew sha ka ophis ka Hima, ka HYC ka kyntu ïa u Myntri ka tnat pulit ba un ïarap lem ïa kitei ki nongshong shnong kumjuh ruh ïa ka Hima Nonglang.
Shuh shuh u la ïathuh ba don kiba ong ïa ka HYC ba balei ki leit kyrshan ïa ki Garo haba ki leit noh sha Assam bad kane ka long kaba sngewsih. Ka seng ka ong ba lada ym kyrshan ïa ki paralok Garo hato yn kyrshan ïa ki bar jylla ki ban wan buhai ha kine ki jaka.
Namar kata, u samla Lumlang u la ong ruh ba lada katei ka jingïapynbeit pud kan long ha katei ka daw, ka jingma ka long ba wat ki paradoh parasnam ha Langpih Sector kin ngat kumjuh lada ym shimkhia mynta.
